Gylfi Ólafsson, forstjóri Heilbrigðisstofnunar Vestfjarða, hefur vakið athygli og aðdáun margra fyrir vasklega og fagmannlega framgöngu í baráttunni við Covid-19 á Vestfjörðum. Færri vita þó að hann á sér fortíð sem tónlistarmaður, var árum saman annar helmingur dúettsins Ingvar & Gylfi sem hann og frændi hans Ingvar Alfreðsson stofnuðu sem unglingar á Ísafirði.
Meðal þess sem dúettinn góði sendi frá sér var Páskalagið sem aldeilis óvænt komst á allra varir eftir að það var flutt í þætti Atla Más Steinarssonar, Atli það ekki, á Rás 2 á laugardaginn. Lagið er íðilhresst gleðipopp og ætti að koma samkomusveltri þjóðinni í hressilegt stuð á þessum síðasta degi páska.
Fram kemur á Facebook-síðu dúettsins að Atli Már hafi reyndar farið með rangt mál í þætti sínum þegar hann sagði lagið tveggja til þriggja ára gamalt, það sé mun nær því að vera tuttugu ára.
Þótt Gylfi hafi að mestu lagt tónlistarferilinn á hilluna, að því er best er vitað, er ekki sömu sögu að segja af Ingvari frænda hans sem enn er á fullu í tónlistinni, útsetur og stjórnar hljómsveitum á flestum viðburðum sem Rigg viðburðir standa fyrir, meðal annars á Fiskideginum mikla á Dalvík.
Gylfi lék á gítar og söng ásamt Ingvari sem lék á hljómborð í þessum merka dúett. Spurning hvort hann dusti rykið af gítarnum og þeir frændur skelli í nýtt lag þegar um hægist hjá honum í baráttunni við faraldurinn. Á meðan við bíðum eftir því geta áhugasamir hlustað á lagið hér eða kíkt á Facebook-síðu dúettsins til að kynnast verkum þeirra nánar. Þar er meðal annars að finna ýmsar myndir af þeim frændunum í ham á sviðinu.
Athugasemdir