Taka þarf ákvörðun um hvar og hvernig sóttvarnarhús verður rekið

Erlendir ferða­menn sem reyn­ast smit­aðir af COVID-19 við komu til Íslands þyrftu að hafa aðgang að sótt­varn­ar­húsi. Þetta er meðal þess sem kemur fram í skýrslu verk­efn­is­stjórnar um skimun ferða­manna fyrir COVID-19 á Kefla­vík­ur­flug­velli.

Í kafla skýrsl­unnar um smitrakn­ingu og þjón­ustu við smit­aða ferða­menn segir að þörfin á áfram­hald­andi rekstri sótt­varna­húss, hús­næðis ein­stak­linga í ein­angrun með stað­festan sjúk­dóm, sé brýn og taka þurfi ákvörðun um stað­setn­ingu til lengri tíma. Þá segir að það sé óraun­hæft að ætla að ein­stak­lingar með stað­fest smit dvelji á hót­elum víða um landið.

Íslenska ríkið tók Íslands­hót­el á Rauðar­ár­stíg í leigu í lok fe­brú­ar og rak þar far­sótt­ar­hús en síð­ustu sjúk­ling­arnir voru útskrif­aðir þaðan 13. maí. Far­sótt­ar­hús­inu var því lokað um miðjan maí.

Ekki hægt að skylda ferðamenn til að sækja appið

Í skýrsl­unni segir einnig að öflug smitraknin sé skil­yrði fyrir að hægt sé að opna landið aftur. Að mati hóps­ins er nauð­syn­legt að smitrakn­ing­arteymi almanna­varna sinni áfram öfl­ugri vinnu og að ráð­ist verði í frek­ari þróun á smá­forrit­inu Rakning C-19.

Hópurinn segir að ferða­menn ættu að vera hvattir til að sækja for­ritið en að óger­legt sé að slíkt verði skylt eða skil­yrði fyrir komu til lands­ins. „Byggist sú afstaða hvoru tveggja á sjón­ar­miðum um per­sónu­vernd og að eft­ir­fylgni með slíkri skyldu væri óger­leg,“ segir í skýrsl­unni.

Í skýrsl­unni segir einnig að mikil ábyrgð muni hvíla á fyr­ir­tækjum í ferða­þjón­ustu og því þurfa kröfur til þeirra að vera skýrar og afdrátt­ar­lausar. „Öll ferða­þjón­ustu­fyr­ir­tæki verða að vera undir það búin að takast á við smit meðal við­skipta­vina sinna og þess verður að krefj­ast að allir aðilar geri við­eig­andi við­bragðs­á­ætl­anir,“ segir í skýrsl­unni sem má sjá í heild sinni hérna.