Nýr hótelstjóri, Thelma Theodórsdóttir, hefur verið ráðin á Fosshótel Reykjavík. Hótelið er stærsta hótel landsins með alls 320 herbergi auk fullkominni funda- og ráðstefnuaðstöðu. Þetta kemur fram í tilkynningu frá Íslandshótelum. Þar kemur fram að hótelið reki einnig Bjórgarðinn og Haust Restaurant.
Thelma hefur starfað hjá Íslandshótelum frá árinu 2015 þegar hún kom að opnun Fosshótel Reykjavík og gegndi þar stöðu aðstoðarhótelstjóra til ársins 2018. Þar kom hún einnig að rekstri Haust Restaurant og Bjórgarðinum.
Thelma tók í framhaldi við sem hótelstjóri á Hótel Reykjavík Centrum í mars 2018 ásamt rekstri á veitingastöðunum Uppsölum og Fjalakettinum. Thelma hefur setið í fagnefndum Íslandshótela og komið að stefnumótun og innleiðingum ferla hjá hótelkeðjunni. Að auki starfar Thelma sem kennari í hótelstjórnun og veitingahúsarekstri við Opna háskólann í Reykjavík í samstarfi við César Ritz háskólann í Sviss.
Íslandshótel á og rekur 17 hótel með yfir 1.800 gistirými út um allt land.
Athugasemdir