Ný reiknivél á vef Póstsins gerir viðskiptavinum mögulegt að reikna út gjöld á sendingum sem koma frá útlöndum. Viðskiptavinur slær inn helstu upplýsingar og reiknivélin reiknar út áætlaðan kostnað miðað við gengi krónunnar hverju sinni.
Á vef Póstsins er sagt frá reiknivélinni. Þar segir að hugmyndin að henni komi frá viðskiptavinum Póstsins sem eru í Facebook-hópnum Verslun á netinu. Umræður í þeim hóp snúast gjarnan um þau gjöld sem þarf að greiða fyrir sendingar frá útlöndum. Hugmyndin með nýju reiknivélinni er þá að auðvelda viðskiptavinum Póstsins að reikna úr hvert heildarverð vörunnar sem þeir eru að kaupa er.
„Með því að nota reiknivélina geta viðskiptavinir nú reiknað öll gjöld sem falla á sendingar frá útlöndum við komu til landsins og séð þannig heildarkostnað vöru með einföldum hætti. Reiknivélin reiknar út hver gjöldin eru af viðkomandi sendingu að gefnum þeim forsendum sem viðskiptavinir velja,“ segir á vef Póstins.
„Hugmyndin bakvið reiknivélina er að auðvelda viðskiptavinum að nálgast allar upplýsingar um gjöld af erlendum sendingum til að þeir geti tekið upplýstar ákvarðanir þegar þeir eru að versla á netinu. Við viljum að netverslun sé gagnsætt ferli og að viðskiptavinir okkar viti sem mest þegar kemur að kaupákvörðun, við hvetjum því alla sem eru að versla sér af netinu erlendis frá að nýta sér þessa lausn,“ er haft eftir Sesselíu Birgisdóttur, framkvæmdastjóra þjónustu- og markaðssviðs Póstsins.
Athugasemdir