Alls sótti 41 um starf útvarpsstjóra sem var auglýst laust til umsóknar 15. nóvember, en umsóknarfrestur rann út 10. desember.
Stefán Eiríksson verður nýr útvarpsstjóri. Hann tekur til starfa 1. mars næstkomandi. Þetta kemur fram á vef RÚV. Ákvörðun um að ráða Stefán var tekin samhljóða á fundi stjórnarinnar í gærkvöldi er fram kemur í frétt RÚV.
Stefán Eiríksson hefur verið borgarritari síðan í desember 2016. Áður var hann lögreglustjóri á höfuðborgarsvæðinu. Stefán er menntaður lögfræðingur með próf frá Háskóla Íslands.
Í tilkynningu frá stjórn útvarpsins segir að Stefán hafi umfangsmikla reynslu af stjórnun og rekstri, sem stjórnandi opinberrar stofnunar um árabil, sem skrifstofustjóri og staðgengill ráðuneytisstjóra, sem stjórnarmaður og stjórnarformaður í opinberu hlutafélagi, sem sviðsstjóri velferðarsviðs Reykjavíkurborgar og nú síðast sem borgarritari og staðgengill borgarstjóra.
Starf útvarpstjóra var auglýst eftir að Magnús Geir Þórðarson sagði starfinu lausu, en hann var skipaður þjóðleikhússtjóri frá og með 1. janúar. Magnús Geir hafði gegnt stöðu útvarpsstjóra frá árinu 2014.
RÚV gaf út að nöfn umsækjenda um stöðuna yrðu ekki gerð opinber og var það afar umdeilt.
Útvarpsstjóri er ráðinn af stjórn til fimm ára í senn.
Athugasemdir