Mikill styr hefur staðið um starfsemi SÁÁ að undanförnu og er búist við hörðum slag á aðalfundi samtakanna sem fer fram næstkomandi þriðjudag þegar m.a. verður kosið um nýjan formann. Tveir sækjast eftir formennsku, þeir Einar Hermannsson, stjórnarmaður í SÁÁ, og Þórarinn Tyrfingsson, fyrrverandi formaður SÁÁ og yfirlæknir á Vogi. Báðir segjast vilja skapa frið innan samtakanna. Nóg sé komið af átökum.
Í vikunni lét Einar hafa eftir sér að hann vildi skapa frið innan SÁÁ. Sagði hann samskipti sín og Þórarins jafnframt alltaf hafa verið góð og að hann gæti hugsað sér að nýta Þórarin í verkefni innan SÁÁ verði hann sjálfur kjörinn formaður. Einar sagði tíma ósættis og átaka innan SÁÁ vera liðinn. Hann sagði sitt framboð snúast um að vilja skapa gott samstarf innan SÁÁ. Það væri nauðsynlegt til að starfið gangi vel fyrir sig.
Þórarinn lýsti því einnig yfir í vikunni að hann byði sig nú fram til að stilla til friðar innan samtakanna, en hann hefur sagt í viðtali við Mannlíf að hann eigi ekki sök á átökunum innan SÁÁ. „Ég er hryggur yfir því hvernig staðan er. Ég á enga sök á því og hef hvergi komið þarna nærri á nokkurn hátt enda ekki með neitt umboð til þess. Mér finnst að það þurfi að ná sátt og sameiningu aftur í málin og vill gera mitt til þess.“
Athugasemdir