Verða að aflýsa fjölda flugferða á næstu dögum

Af­lýsa þarf fjölda áætl­un­ar­ferða til Kefla­vík­ur­flug­vall­ar næstu daga þar sem af­kasta­geta í smit­próf­un­um á komuf­arþegum er ekki nægj­an­lega mik­il. Talið er að ferða­plön um tvö þús­und far­þega muni riðl­ast næstu daga vegna nið­ur­fell­ing­ana.

Á vefnum Túristi.is er greint frá því að þegar skimanir á komu­far­þegum á Kefla­vík­ur­flug­velli hafi byrjað 15. júní þá hafi afkasta­getan tak­markast við tvö þús­und sýni á dag. Hingað til hafi ekki reynt á þetta hámark en frá og með mið­viku­deg­inum næst­kom­andi þurfi að fella niður allt að sex áætl­un­ar­flug á dag til að halda fjölda komu­far­þega undir tveimur þús­undum.

Segir að vefnum um ferða­plön um tvö þús­und far­þega muni riðl­ast næstu daga vegna þess­ara nið­ur­fell­inga. Samkvæmt evr­ópskum reglum eigi far­þegar rétt á bótum upp á 400 evrur, 64 þús­und krónur, ef flug­ferðir eru felldar niður með stuttum fyr­ir­vara. Nái regl­urnar utan um þessar aðstæður blasi við að greiða þurfi far­þegum næstu daga um 128 millj­ónir í bætur.

Ósammála um hver eigi að takast á við stöðuna

Rætt er við tals­mann Isavia sem segir það vera í verka­hring svo­kall­aðs sam­ræm­ing­ar­stjór­a fyr­ir ís­lenska flug­velli að takast á við stöð­una. Umræddur sam­ræm­ing­ar­stjóri, Frank Holt­on, fram­kvæmda­stjóri Airport Coord­inati­on, er þessu hins vegar ósam­mála.

„Ég sé að Isavia reiknar með að ég, sem sam­ræm­ing­ar­stjóri, taki að mér það verk­efni að valda far­þegum og flug­fé­lögum von­brigðum með því að svipta þau áður stað­festum lend­ing­ar­tímum. Það get ég gert en ákvörðun um slíkt verður að koma frá Sam­göngu­stofu og þaðan þurfa að koma leið­bein­ingar um hvernig velja eigi á milli flug­ferða við þessar sér­stöku aðstæður,” segir Holton í sam­tali við Túrista.

Segir hann að auka þyrfti afkasta­get­una í smit­próf­unum upp í þrjú þús­und sýni á dag, næstu tvær vikur, til að koma í veg fyrir nið­ur­fell­ingu á flug­ferðum. Önnur lausn gæti verið að veita ákveðnum þjóðum und­an­þágu frá skimunum.

Í dag hefur verið boð­aður auka­fundur hjá sam­ræm­ing­arteymi íslenskra stjórn­valda vegna máls­ins.