Þórhildur Þorleifsdóttir, leikstjóri og baráttukona, er ómyrk í máli í Facebook-status um stjórnarskrármálið í gærkvöld og vandar Katrínu Jakobsdóttur forsætisráðherra ekki kveðjurnar. Rekur hún sögu stjórnarskráa á Íslandi og bendir á að hvorki 1835 né 1944 hafi nokkur kona komið að gerð þeirrar stjórnarskrár sem þá var sett saman.
„Síðan hefur Alþingi rembst eins og rjúpan við staurinn að breyta stjórnarskránni en aldrei haft erindi sem erfiði. Svo kom kona og ákvað að nú skyldi bara samin ný stjórnarskrá og fela þjóðinni það hlutverk. Það þaf ekki að lýsa því ferli sem var merkilegt á heimsvísu en þóknaðist ekki því háa Alþingi,“ segir Þórhildur. „Og nú er búið að fela EINUM KARLAMANNI að semja nýja stjórnarskrá og því miður var það kona sem afhenti honum þetta hlutverk. Hvað gengur að Katrínu Jakobsdóttur? Hvar er virðing hennar fyrir lýðræðinu, þjóðinni og ekki síst konum!“
Þórhildur lýkur færslunni með því að segja frá stofnun félagsskapar fjórtán þúsund kvenna til að berjast fyrir því að stjórnarskráin sem þjóðin samþykkti árið 2012 verði virt og býður Katrínu að bætast í hópinn. „Það er því engin tilviljun að konur hafa nú sameinast í félagi sem berst fyrir því að fá nýja stjórnarskrá – sem liggur reyndar tilbúin á borðum þingmanna og ráðherra. Tæplega 14 þúsund konur hafa sameinast. Eru mörg félög á Íslandi fjölkmennari/kvennari en þetta. Mig langar að bjóða Katrínu Jakobsdóttur í þennan góða félagsskap og vita hvort henni snýst ekki hugur og lætur af þessari vitleysu! EINN KARLMAÐUR Á MÓTI 14 ÞÚSUND KONUM!“
Athugasemdir