50 mál komu inn á mál lögreglunnar á höfuðborgarsvæðinu á dagvaktinni frá klukkan fimm í morgun til klukkan 17 í dag.
Ökumaður var handtekinn í austurbænum um hálfsjö í morgun, grunaður um ölvun við akstur.
Karlmaður var handtekinn um hálfníu í morgun við lögreglustöðina á Hverfisgötu. Sá maður hafði losnað úr fangaklefa stuttu áður eftir að hafa dvalið þar vegna ölvunaraksturs. Þegar honum var sleppt þá neitaði hann að fara í burtu og kom nokkrum sinnum aftur og hlýddi ekki ítrekuðum fyrirmælum lögreglu um að fara á brott. Hann vann sér inn áframhaldandi dvöl hjá lögreglu.
Maður var handtekinn við innbrot í fyrirtæki í Kópavogi um sexleytið í morgun. Maðurinn var vistaður í fangaklefa vegna rannsóknar málsins.
Tilkynnt var um líkamsárás í Breiðholti um klukkan 11. Lögreglan hafði þar afskipti af tveimur mönnum en ekki kom til þess að þeir væru handteknir.
Rétt fyrir klukkan 10 var tilkynnt um nytjastuld á bifreið. Ökumaður var við vinnu í Hafnarstræti og leit af bifreiðinni í stutta stund og var hún tekin ófrjálsri hendi á meðan. Bifreiðin, lítil hvít Renault sendibifreið, hefur ekki fundist.
Um klukkan 15:30 var maður stöðvaður fyrir búðarhnupl í verslunamiðstöð í austurbænum. Málið var afgreitt á vettvangi.
Hálftíma síðar hafði lögreglan afskipti af konu í verslunarmiðstöð í Kópavogi en hún hafði setið þar að snæðingi. Þegar kom að því að borga reikninginn þá hafði hún ekki fjármuni meðferðis.
Athugasemdir