Áslaug Arna Sigurbjörnsdóttir dómsmálaráðherra hefur beðist afsökunar á því að þegið boð Landhelgisgæslunnar um þyrluflug frá Suðurlandi til Reykjavíkur og til baka. Stundin greindi frá því í gær að þyrla Landhelgisgæslunnar hafi sótt Áslaugu í Reynisfjöru á fimmtudaginn en þar var hún stödd í hestaferð.
Þetta er enn annað hneykslismálið tengt ráðherra Sjálfstæðisflokksins á stuttum tíma. Skemmst er að minnast fyrr í þessum mánuði þegar Þórdís Kolbrún Reykfjörð Gylfadóttir virti ekki reglur um sóttkví. Illugi Jökulsson segir á Facebook að nú sé nóg komið og gagnrýnir bæði Sjálfstæðisflokkinn sem og VG fyrir að hafa farið í samstarf með þeim flokki.
„Þetta er Sjálfstæðisflokkurinn, gjörið svo vel! Það hvarflaði ekki að Bjarna Benediktssyni að það væri neitt rangt við reikninga hans á Seychelles-eyjum. Það hvarflaði ekki að Kristjáni Þór Júlíussyni að það væri neitt rangt við að hringja í vin og spyrja áhyggjufullur hvernig honum liði eftir að sannfærandi ásakanir birtust um stórfelldar mútugreiðslur vinarins,“ segir Illugi og heldur áfram:
„Það hvarflaði ekki að Sigríði Andersen að það væri neitt rangt við að makka með dómarastöður eins og henni og félögum þóknaðist. Það hvarflaði ekki að Þórdísi Kolbrúnu að skemmta sér með vinkonum sínum tveim dögum eftir að hún sjálf skrifaði grein í blað þar sem hún hvatti til varúðar. Það hvarflaði ekki að Áslaugu Örnu að það væri neitt rangt við að hún fengi björgunarþyrlu Landhelgisgæslunnar til sendiferða. Takk kærlega, Katrín og Svandís, fyrir að hafa haldið þessum spillta forréttindaflokki við völd eftir kosningarnar síðustu. TAKK.“
Athugasemdir