Alma um dauðsföllin tólf vegna Landakotsveirunnar: „Auðvitað þarf að finna skýringar“

Alma Möller land­læknir segir það ljóst að finna þurfi skýr­ingar á þeim tólf dauðs­föllum sem orðið hafa vegna hópsmits­ins sem kom upp á Landa­koti. Það verði að vera hægt að læra af mis­tök­unum til að koma í veg fyrir end­ur­tekn­ingu. Hvað varðar lög­reglu­rann­sókn segir hún það í höndum Land­spít­al­ans að til­kynna hópsmitið til lög­reglu.

Alma ræðir hópsmitin í sam­tali við Stundina í dag ásamt Þórólfi Guðn­a­syni sótt­varn­ar­lækni. Bæði segj­ast þau ekki vita enn hver orsök hópsmits­ins er eða hvort hún teng­ist mann­eklu líkt og for­stjóri spít­al­ans hefur full­yrt. Tilkynnt var um hópsmitið til emb­ættis land­læknis en í lögum um land­lækni segir að verði óvænt dauðs­fall á heil­brigð­is­stofnun sem ætla má að rekja megi til mis­taka, van­rækslu eða óhappa­til­viks skuli til­kynna það líka til lög­reglu. Eftir því sem Mannlíf kemst næst hefur það ekki enn verið gert.

Nú hafa tólf Íslend­ingar lát­ist vegna Landa­kotsveirunnar. Kona sem lést í vik­unni er tólfti sjúk­ling­ur­inn sem fellur fyrir Landa­kots­smit­inu. Samtals hafa 25 lát­ist hér á landi vegna Covid og því er hátt í helm­ingur alla lát­inna sem teng­ist þessu alvar­lega hópsmiti. Landakot er hluti af Lands­spít­al­anum og undir stjórn hans. Sýk­ing­ingin hefur ekki verið til­kynnt til lög­reglu en starfs­manni spít­al­ans hefur verið falið að rann­saka það hvað fór úrskeiðis. Nið­ur­stöður þeirrar vinnu verður kynnt í dag. Þegar er við­ur­kennt að Landa­koti var ekki skipt niður í sótt­varna­hólf. For­stjóri spít­al­ans sagði það vera vegna mann­eklu. Þetta hefur nú þegar kostað tólf manns­líf.

Alma bendir á að það laga­skyldan sé hjá Land­spít­ala um hvort atvik eru til­kynnt til lög­reglu. Hún segir mik­il­vægt að fá skýr­ingu á þeim dauðs­föllum sem orðið hafa. „Þannig að við getum ekki tjáð okkur um það á þess­ari stundu. Eins og þú segir hafa þarna orðið dauðs­föll og auð­vitað þarf að finna skýr­ingar á þeim. Það sem snýr að emb­ætt­inu er að finna skýr­ingar á hlut­unum, þannig að hægt sé að læra af þeim og koma í veg fyrir að þeir end­ur­taki sig,“ sagði Alma í sam­tali við Stundina.

Þrettán íbúar af nítján íbúum öldr­un­ar­heim­il­is­ins Sólvalla á Eyr­ar­bakka smit­uð­ust af COVID-19 eftr að sýktur íbúi var fluttur þangað af Landa­kots­spít­ala. Þá hafa bæði sjúk­lingar og starfs­menn á Reykja­lundi smit­ast af Covid vegna Landa­kots.

Mynd / Lög­reglan

Þórólfur segir kór­ónu­veiru­far­ald­ur­inn hafa ber­skjaldað veik­leika heil­brigð­is­kerf­is­ins hér á landi. Hann vill ekki fella dóm á Landa­kost­málið. „Menn þurfa auð­vitað að fara gagn­gert ofan í skipu­lag til að sjá hvort að það hafi ein­hverju verið ábóta­vant en það sýnir sig í þessum far­aldri, og í þessum hóp­sýk­ingum sem við höfum verið að sjá út um borg og bý, þá getur þetta verið mjög snúið. Hvað varðar Landakot treysti ég mér ekki til að fella neinn dóm á það. Ég held að það komi í ljós núna hvað spít­ala­kerfið er í raun veik­burða til að takast á við svona slæman far­aldur. Ég held að menn þurfi að hugsa um það til fram­tíðar frekar en að vera að finna ein­hverja söku­dólga aftur í tím­ann,“ segir Þórólfur.

Svandís Svav­ars­dóttir hefur hafnað að tjá sig við fjöl­miðla um hópsmitið á Landa­koti. Hún segir það ekki á hennar borði. Þá hafn­aði Páll Matth­í­as­son, for­stjóri Land­spít­al­ans, beiðnum Mannlífs um við­tal vegna máls­ins.