Veitur biðla til þjóðarinnar um að spara heita vatnið næstu daga þar sem útlit er fyrir eitt mesta kuldakast á suðvesturhorninu síðustu sjö ár. Heita vatnið er sameiginleg auðlind okkar allra segir fyrirtækið og með samstilltu átaki viðskiptavina þess megi minnka notkun þannig að hitaveitan standist álagið sem kuldakastið veldur.
Þetta kemur fram í erindi sem Veitur hafa sent viðskiptavinum sínum. Fyrirtækið hefur nú virkjað viðbragðsáætlun sína vegna kuldakastsins framundan. „Sú áætlun gengur meðal annars út á að hvetja fólk til þess að fara sparlega með heita vatnið svo öll hafi nægt vatn til húshitunar. Sé tekið mið af spálíkönum, sem nýta veðurspár til að áætla notkun, er útlit fyrir að hitaveitan á höfuðborgarsvæðinu fari að þolmörkum á föstudag og fram yfir helgi. Um 90 prósent af hitaveituvatni er notað til húshitunar og því skiptir afar miklu máli að fólk sé meðvitað um hvernig nýta á það sem best. Mikilvægt er að hafa í huga að þeir köldu dagar sem við höfum upplifað undanfarið hafa verið í hæglátu veðri. Nú er hins vegar útlit fyrir töluverðan vind sem veldur mikilli kælingu ofan á það frost sem er í kortunum. Heita vatnið er sameiginleg auðlind okkar allra og með samstilltu átaki viðskiptavina má minnka notkun þannig að hitaveitan standist álagið sem kuldakastið veldur,“ segir í bréfinu til viðskiptavinanna.
Samkvæmt ráðleggingum fyrirtækisins getur þú sparað heita vatnið með því að fylgja eftirfarandi ráðum:
- Hafa glugga lokaða.
- Hafa útidyr ekki opnar lengur en þörf krefur.
- Láta ekki renna í heita potta.
- Stilla ofna svo þeir séu heitir að ofan en kaldir að neðan.
- Varast að byrgja ofna.
- Minnka þrýsting á snjóbræðslukerfum.
Athugasemdir