Eimskip hefur efnt til verðlaunaveitinga í tengslum við 107 ára afmælis skipafélagsins im liðna helgi. Upphaflega var stofnað til félagsins af almenningi á Íslandi og það gjarnan kallað Óskabarn þjóðarinnar. Nokkur viðbrögð hafa orðið vegna afmælisins og þá sérstaklega vegna þess að kennitala fyrirtækisins er mun yngri eða síðan 2009. Félagið er því í raun 12 ára en ekki aldargamalt. Ólga er vegna þessa og sérstaklega meðal gamalla hluthafa.
Á Facebook-síðu félagsins er því haldið fram að félagið sé meira en aldargamalt. „Eimskip er 107 ára í dag. Í tengslum við afmælið ár hvert heiðrum við þá starfsmenn sem hafa unnið hjá félaginu í 25 ár með Gullmerki Eimskips fyrir farsælan feril hjá félaginu. Í ár voru það 13 starfsmenn sem hlutu Gullmerkið,“ segir á síðunni. Andmæli við aldur félagsins komu fram á síðunni og þá sérstaklega í því ljósi að gömlu hlutabréfin í félaginu urðu verðlaus við við kennitöluflakkið. Meðal þeirra sem mótmæltu var Friðrik Brekkan.
„Þeir eiga að sjá sóma sinn að leysa til sín öll gömul hlutabréf sem menn eiga og sýna þeim sem byggðu grunninn sóma. Átti von á að einhver slík hugsun kæmi upp á 100 ára afmælinu…en nei…þá var hent tugum milljóna í eitt stórt partý í Hörpunni. Hafði í framhaldi samband við Eimskip og viðraði mína hugmynd. Fékk dónalegt svar til baka þar sem mér var tjáð að hlutabréfin gömlu væru verðlaus því nú væri nýtt félag með öðru nafni….en samt halda menn áfram að berja sig á brjóst á grunni vinnu allra þeirra sem einlægt trúðu á fyrirtækið og fjárfestu í því. Skammarleg framkoma vægast sagt,“ skrifar Friðrik.
Hin neikvæðu viðbrögð eru nú horfin af síðu Eimskips. Samherji er stærsti eigandi félagsins. Stjórnarformaður Eimskips er Baldvin Þorsteinsson, sonur Þorsteins Más Baldvinssonar en framkvæmdastjóri er Vilhelm Þorsteinsson, frændi hans.
Athugasemdir