Heiða Björg Hilmisdóttir, varaformaður Samfylkingarinnar, hefur eytt ummælum sínum við færslu flokkssystur sinnar, Rósu Bjarkar Brynjólfsdóttur, þar sem sú síðarnefnda kallaði eftir ritskoðun á frétt af andláti klámkóngsins, Larry Flynt.
Líkt og Mannlíf greindi frá í morgun, þá hvatti Rósa alla femínista til að skrifa kvörtunarbréf til þeirra fjölmiðla sem greindu frá andláti Larry Flynt, stofnanda klámblaðsins Hustler. Rósa segir slíka frétt ekki eiga erindi fyrir almenning. Heiða Björg skrifaði eftirfarandi athugasemd, sem nú er horfin: „Bara ha ?“
Andlát klámkóngsins virðist ætla hafa þær afleiðingar að allt fer á annan endann hjá Samfylkingunni. Flynt hefði líklega haft gaman af þessu þar sem hans barátta hans fyrir málfrelsi hefur verið talið meðal hans ef til vill fáa dyggða. Milos Forman gerði í það minnsta kvikmynd um það.
Rósa hefur haft samband við Mannlíf og lýsti yfir vanþóknun sinni yfir fréttinni. Hún nefndi þó ekkert rangt sem mætti leiðrétta.
Heiða segist í samtali við Mannlíf ekki hafa skilið orð Rósu og ekki fattað að þetta væri umræða í hóp á Facebook. Hún ítrekaði í samtali að hún skildi ekki hvað Rósa átti við. Þegar hún var spurð hvort hún teldi rétt að ritskoða fréttir af andláti manna eftir gæsku þeirra þá svaraði hún: “Ég held við ættum að fara varlega í allt slíkt.”
Heiða vildi þó leiðrétta eitt, hún sé ekki að sækjast eftir sæti á lista Samfylkingarinnar fyrir Alþingiskosningar. Heiða situr í borgarstjórn og fjöldi fjölmiðla svo sem Vísir og Fréttablaðið fullyrtu að Heiðu hefði snúist hugur um framboð til þings. Fréttablaðið sagði uppstillingarnefnd flokksins hafa borist boð þess efnis. Það þótti heldur seint í rassinn gripið því nefndin var að ljúka störfum.
Heiða segir nú að hún hafi aldrei lagt þetta boð fram og hún sé ekki á leið á þing. Þetta hefur þó hvergi verið leiðrétt fyrr en nú. Heimildir Mannlífs herma að Fréttablaðið, sem greindi fyrst frá þessu, hafi aldrei borist beiðni um leiðréttingu.
Athugasemdir