Ekki ganga ofan á hrauninu! Það er stórhættulegt. Varað við því að mökkinn frá gosinu leggi yfir gönguleiðina og hætta sé á gasmengun.
Svo segir í færslu frá björgunarsveitinn Þorbirni sem hefur staðið vaktina dag sem nótt frá því eldgósið hófst. Sveitin hefur ásamt öðrum sveitum verið að störfum stanslaust. Fólk skiptist á að fara að sofa og vaktirnar eru langar.
Þar segir ennfremur: „Verkefni okkar í kringum svona eldgos eru aðallega tvíþætt. Í fyrsta lagi nýtum við þekkingu okkar og tækjabúnað til þess að aðstoða vísindamenn frá hinum ýmsu stofnunum við rannsóknir. Þessar rannsóknir hjálpa þessu sama fólki að átta sig betur á því hvað er í gangi og hvar hætturnar leynast. Í öðru lagi erum við að aðstoða Lögregluna á Suðurnesjum við ýmis verkefni. Verkefnin eru t.d. þau að upplýsa fólk við gosstaðinn um gasmegnun, hjálpa til við lokanir á leiðum og svo framvegis,“ kemur fram í færslunni.
Eldgos í fangið
„Það er einfaldlega þannig að við fengum þetta eldgos beint í fangið og á stað sem er mjög óaðgengilegur. Þangað liggja hvorki gönguleiðir né vegslóðar sem gerir þetta verkefni mun flóknara fyrir okkur. Ofan á þetta hefur verið mjög hvasst og leiðinlegt veður.
Á meðan við höfum verið að ná utan um ástandið hefur fólk í þúsundatali lagt leið sína á svæðið. Okkur þykir það mjög skiljanlegt og við vildum að við gætum tekið betur á móti öllum. Í gærkvöldi fór svo allt í skrúfuna og fólki gekk illa að komast frá eldgosinu sem endaði með fjölda örmagna fólks sem þurfti á aðstoð okkar að halda. Við vildum óska þess að staðan væri betri og viljum koma því á framfæri hér með að við björgunarsveitarfólk erum einfaldlega sjálfboðaliðar sem hlaupa undir bagga með ýmsum aðilum þegar á reynir. Við tökum ekki ákvarðanir um lokanir né skilgreind hættusvæði, stofnanir og lögregla gera það.“
Þorbjarnarsmenn- og konur segja að þau hafi náð betur utan um verkefnið þótt mikið óveður hafi gengið yfir og hafi þeim gengið vel í sínum verkefnum.
Farið varlega!
Síðdegis í dag fór 10 manna hópur frá sveitinni í stikuferð upp á Fagradalsfjall í brjáluðu veðri og nú í kvöld lauk því verkefni. Nú er hægt að ganga stikaða slóð frá Suðurstrandavegi að gosstöðvunun á mjög þæginlegan máta og tekur um eina og hálfa klukkustund fyrir vel búið fólk að ganga þá leið en hún er um 3.5 km eða 7 km fram og til baka.
„Að gefnu tilefni viljum við biðja fólk um að fara varlega, fylgjast með veðurspá og vera vel útbúin. Nú þegar það lægir vind má búast við mikilli gasmengun í kringum gosið. Það er vegna þess að gígurinn er í mikilli lægð og þegar vindurinn blæs ekki gasinu frá leggst það ofan í lægðina.“
Athugasemdir