Halldóra þingkona lærði að fyrirgefa nauðgara sínum: „Mér fannst þetta vera mér að kenna“

Þegar Halldóra Mogensen, þing­kona Pírata, var sautján ára gömul var henni nauðgað. Á þeim tíma datt henni ekki í hug að kæra og ákvað að harka það bara af sér. Vegna atburð­ar­ins bar hún litla sem enga virð­ingu fyrir sjálfri sér í mjög langan tíma. Á end­anum ákvað hún að fyr­ir­gefa nauð­gar­anum.

Í æsku upp­lifði Halldóra rót­leysi er hún ólst upp hjá ein­stæðri móður og þá var hún lögð í gróft ein­elti. Þetta er meðal þess sem fram kemur í við­tali við hana í Einka­líf­inu á Vísi. Þar lýsir Halldóra hinni erf­iðu upp­lifun að vera nauðgað sem tán­ingur.

„Ég átta mig alveg á því að þetta hafði gríð­ar­lega mikið áhrif á mitt líf. Maður tekur þetta rosa­lega inn á sig og kennir sjálfum sér um. Ég bar enga virð­ingu fyrir sjálfri mér í mjög langan tíma. Það hafði áhrif á öll tengsl við karl­menn, líka við konur og alla,“ segir Halldóra og bætir við:

„Á þessum tíma var ekk­ert talað um þetta. Mér datt ekki einu sinni í hug að kæra, því mér fannst þetta vera mér að kenna. Ég skamm­að­ist mín svo mikið fyrir þetta. Svo bara harkar maður þetta af sér.“