Mökkurinn frá gosinu í Geldingadölum sást víða að í dag eftir að óveðrið gekk niður og sólin braust fram. Blíðviðri er á svæðinu og hafa þúsundir streymt á gosstöðvarnar til að upplifa og sjá dýrðina þegar hraunið spýtist upp úr gígnum og hálfan dalinn fyllir. Lögregla hefur stýrt umferð inn á svæðið en eisntefna er austur Suðurstrandarveg.
Veður til göngu er frábært og snjó frá því í nótt tekur óðum upp. Eini farartálminn er á gömlu stikuðu leiðinni þar sem Brattabrekka reynist mörgum skeinuhætt. Þá hafa einhverjir varað við mögulegum smitum af þeirri nánd sem skapast. Það er þó fremur langsótt kenning þar sem fólk dreifist á 8 kílómetra leggi.
Útlit er fyrir þokkalegt veður næstu dagana og munu þá margir geta notið þess að sjá gosið í návígi. Enginn veit hve lengi gosið mun standa. Sumir tala um að það standi árum saman. Víst er að þetta er einn stærsti happrættisvinningur sem íslensk þjóð í kreppu gat fengið. Auglýsingin er ómetanleg og víst að ferðamenn munu flykkjast til Íslands að skoða gosstöðvarnar. Ávinningurinn ræðst þó af því að gosið verði áfram lágtemprað og ekki fari allt í bál og brand.
Athugasemdir