„Þetta er drekkhlaðin spurning sem maður almennt spyr ekki transfólk,“ segir Hans Jónsson ákveðinn. Hans er transmaður og var hann í viðtali í hlaðvarpsþættinum 10 bestu, þegar hann var spurður að því hvað hann hefði heitið í gamla daga.
„Hvað héstu áður og fullt af svona spurningum sem að er beint að transfólki er oft rosalega nálægt því að spyrja um kynfæri fólks,“ segir Hans og heldur áfram: „Fyrir rosalega marga er nafnið sem þeim var gefið það er svona „this name is dead to me“ tengir ekkert við það lengur.“
Segir Hans að hið upprunalega nafn transfólks sé eitthvað sem því hafi verið gefið og það sjálft hafi í raun ekkert með að gera og ítrekar að því sé það ekki í lagi að spyrja um fyrra nafn transfólks.
Hans gefur þó upp fyrra nafn sitt, sem var Hólmfríður. Hann gerir létt grín að því að honum hafi því í raun verið gefið karlmannsnafn strax í upphafi, því upprunalega sé Hólmfríður karlmannsnafn. Hólm-fríður, fegursti maðurinn á hólminum og bendir á karlmannsendingu nafnsins -ur.
„Það er bara mikið heilbrigðara fyrir alla að vera ekkert að þykjast vera eitthvað sem maður er ekki.“
Hans segir að eitt af því sem fólk hafi miklar áhyggjur af þegar það er til dæmis að koma út úr skápnum, séu börnin þeirra og hvernig þau muni taka því. Segir hann margar manneskjur bíði með að koma út úr skápnum og bíði þar með með að vera það sjálft, þangað til að börnin eru orðin fullorðin.
„Það er ekki endilega besta lausnin,“ segir hann og bendir á að fordómar sé hlutur sem fólk læri eftir því sem það verður eldra og að því eldri sem manneskjan verður þeim um meira séu fordómarnir búnir að festa sig í sessi.
„Þannig rosalega oft bara upp á heilbrigt samband við börnin sín þá er oft bara betra að rífa plásturinn af snemma, viðurkenna sjálfan sig og vera heiðarlegur við börnin sín,“ segir Hans sem sjálfur á barn sem hann gekk með áður en kynleiðréttingaferli hans hófst.
Hans segir að á ákveðnum tímapunkti hafa hann vitað að hann gæti ekki lengur þóst vera kvenmaður, það bara væri ekki rétt, hann væri ekki kvenmaður. Annað hvort þyrfti hann að taka þá ákvörðun að halda áfram að þykjast vera eitthvað sem hann væri ekki eða að hann þyrfti að gera eitthvað í því að geta verið sá sem hann væri: „Það er bara mikið heilbrigðara fyrir alla að vera ekkert að þykjast vera eitthvað sem maður er ekki.“
Hægt er að hlusta á viðtalið í heild sinni hér.
Athugasemdir