Erling Ingvason, tannlæknir og samfélagsrýnir, ber saman stöðuna á Íslandi annars vegar og í Nýja-Sjálandi hins vegar í stöðufærslu á Facebook. Hann segir slíkan samanburð sýna vel hversu illa ríkisstjórnin hefur leikið Íslendinga. Hann tekur þar undir með Gylfa Zoega sem sagði í Kastljósi í gær að það væri algjört glapræði að opna landið.
„Gylfi Zoega sat fyrir svörum í Kastljósinu í gær, þar endurtók hann mestmegnis það sem hann (og fleiri) sagði fyrir ári síðan; að það væri glapræði að opna landið til að reyna að blása lífi í 10% hagkerfisins en drepa með því allt hagkerfið (90 prósentin og tíu prósentin alveg jafnt) og samfélagið með, í dróma,“ skrifar Erling.
Hann segir þessa skelfilegu ákvörðun hafa rústað daglegu lífi Íslendinga. „Þetta er það sem gerðist sumarið og haustið 2020 því ríkisstjórn Katrínar Jakobsdóttur kaus að hunsa þessi rök Gylfa og fleiri og rústuðu með því daglegu lífi fólks langt umfram nauðsyn,“ segir Erling og tekur svo saman stöðuna í landi sem fór aðra leið:
„Þetta er staðan núna, eftir rúmlega heilt ár af faraldri:
Ísland vs. Nýja-Sjáland
Katrín Jakobsdóttir vs. Jacinda Ardern
6,6% samdráttur í þjóðarframleiðslu vs. 2,9% 2020
Þjóðhagsspá 2021: 2,6% hagvöxtur vs. 4,5%
Endalaus röskun á daglegu lífi vs. semi-eðlilegt líf
COVID-dauðsföll pr.100þ.íbúa: 8,5 vs. 0,5
Gjaldtaka pr.mann á sóttkvíarhóteli: 50þús. vs. 420.þús.
Tölurnar tala sínu máli: Verri kosturinn var valinn með verri útkomu fyrir efnahag landsins og verri útkomu fyrir lýðheilsu og gleði þjóðarinnar, það nýjasta í langri röð leiðinda er nýtt samkomubann með lokun skóla, sundstaða, líkamsræktarstöðva og skíðasvæða…aftur og enn.“
Athugasemdir