„Nei, nú eru þessi þjófnaðarmál hér í Vesturbænum orðin alvarleg! Í morgun voru horfnar allar yfirhafnir, sem hanga í fatahengi bakdyramegin. Þetta voru margar vandaðar og fínar flíkur sem eftirsjá er að,“ skrifar kona nokkur í hóp Íbúasamtaka Vesturbæjar.
Segir hún að stundum sé opið út bakdyramegin á daginn þegar vel viðri, en yfirleitt sé lokað á kvöldin. Hún segir einu skýringuna á hvarfi yfirhafnanna vera að einhver hafi farið inn um kjallaradyrnar hjá sér og látið greipar sópa.
Hún skrifar jafn framt að hún hafi stundum orðið vör við fólk vera sniglast á bak við húsið en ekki gert mikið veður út af því, heldur bara rætt við það og beðið það um að fara.
„En þegar þjófar eru farnir að fara alla leið inn á heimilin er þetta orðið einum of! Auðvitað verður haft samband við lögreglu. Spurning hverju það skilar -og næstu grannar varaðir við,“ skrifar hún að lokum.
Skrifar Bjarni nokkur að síðan hann flutti í Vesturbæinn hafi fjórum sinnum verið brotist inn í bíl hans og ýmsir hlutir teknir ófrjálsri hendi úr bifreiðinni.
Að auki skrifar annar íbúi í Vesturbæ að rafhlaupahjóli sonar síns hafi verið stolið. Drengurinn var að spila körfubolta við Hagaskóla þegar svartklæddur einstaklingur með lambhúshettu sem huldi andlit sitt tók hjólið.
Segir annar íbúi að svipað atvik hafi átt sér stað við Grandaskóla.
Einnig hefur mikið borið á því að hjólum hafi verið stolið í hverfinu að undanförnu. En margar auglýsingar hafa birst inni á Facebook hópi íbúa Vesturbæjar um glötuð hjól. Þar var líka birt á dögunum myndband af grunsamlegum ferðum manns, sem virtist vera í leit að álitlegu hjóli.
Athugasemdir