Á mynd af vefsíðu Umhverfisstofnunar Íslands um loftgæði á Íslandi frá því í gær, má sjá að loftgæðin yfir Njarðvík voru langt undir ásættanlegum mörkum.
Samkvæmt veðurfræðingi á Veðurstofu Íslands var um að ræða brennisteinsdíoxíðmengun frá eldgosinu í Geldingadal. Mengunin kom í raun ekki á óvart að sögn veðurfræðings, þar sem spár gerðu ráð fyrir að mengunar yrði vart í og við þéttbýli á Reykjanesskaganum.
Þorsteinn Jóhannsson loftgæðasérfræðingur hjá Umhverfisstofnun segir í samtali við Mannlíf, enga hættu vera eins og stendur. Loftgæði hafi mælst slæm í Njarðvík í gær nokkrum sinnum yfir daginn, en einungis í stuttan tíma í senn og segir hann að slíkt skapi ekki hættu.
Samkvæmt Þorsteini fór mengun yfir 2000 míkrógrömm á rúmmetra í Njarðvík í gær og ef miðað er við töflu Umhverfisstofnunar um skammtímaáhrif vegna brennisteinsdíoxíðmengunar flokkast ástandið þar undir appelsínugula viðvörun, en þá er mengunin sögð óholl fyrir viðkvæma. Við slík loftgæði geta þeir fundið fyrir ertingu í augum, koki og nefi. Þar segir jafn framt að áhrif á heilsufar fólks sé þó ólíklegt en mælst er til þess að fólk dragi úr áreynslu utandyra.
Þorsteinn segir jafnframt að ekki miklar áhyggjur sé að hafa eins og staðan er núna, en ef gosið ílengist og slæm loftgæði verði viðvarandi geti það haft slæm áhrif á heilsu fólks.
Athugasemdir