Mosfellingar öskureiðir: „Hver ræður svona bulli?“

Íbúar Mos­fells­bæjar eru margir reiðir yfir nýju nafni sem valið var á ung­linga­skól­ann í bænum. Hávær umræða fer nú fram um nafnið, sem til­kynnt var um í hádeg­inu í gær og hlaut skól­inn heitir Kvísl­ar­skóli, inni í hópi hverf­is­búa á Facebook.

Óhætt er að segja að hið nýja nafn falli í grýttan jarð­veg og nán­ast allir þeir fjöl­mörgu íbúa sem tjá sig um málið í hópnum eru mót­fallnir nýja nafn­inu. Flestir þeirra hefðu viljað halda við gam­alt heiti skól­ans.

Þórdís nokkur er ein þeirra sem botnar ekk­ert í þessu. „Skil ekki útaf hverju að breyta um nafn,“ segir Þórdís. Og það gerir Guðrún ekki heldur. „Hver ræður svona bulli?,“ spyr hún.

Valdimar er sann­færður um að nýtt nafn séu mis­tök. „Það getur vel verið að honum verði gefið nýtt nafn en hann mun samt alltaf vera Gaggó Mos. Af hverju að gera ein­faldan hlut flók­inn?,“ spyr Valdimar.

Gunn­hildi finnst verið að hundsa vilja íbú­anna. „Það var sem­sagt „lýð­ræð­is­lega“ ákveðið að nokkrar hræður í nefnd hunsi vilja nem­enda og bæj­ar­búa? Ef hitt nafnið var ekki búið að ná festu á 20 árum hvaða remb­ingur er þetta þá að breyta enn og aftur? Þessi skóli er ekki „nýr“ heldur gam­all skóli með margar minn­ingar og langa sögu. Algjör van­virð­ing þetta nafna­hringl!,“ segir Gunn­hildur.

En Erla er sátt. „Fínt nafn með vísan í eitt af skóla­hverfum skól­ans. Til ham­ingju með nýtt nafn Kvísl­ar­skóli,“ segir Erla.