Edda Þöll Hauksdóttir verður jarðsungin í dag en hún lést fyrir tveimur vikum síðan eftir erfiða baráttu við krabbamein. Hún var aðeins 31 árs að aldri og lætur eftir sig unga dóttur sem hún barðist hetjulega fyrir að eignast.
Edda Þöll fæddist í Reykjavík 31. júlí 1989. Hún ólst upp á Laugarásvegi með foreldrum sínum og gekk í Laugarnesskóla og síðar Langholtsskóla. Eftir grunnskólagöngu fór Edda í Húsmæðraskólann. Síðar lauk Edda sjúkraliðanámi við Fjölbrautaskólanum við Ármúla og hóf störf sem sjúkraliði á bæklunarskurðdeild Landspítalans. Þar tók hún síðar við stöðu aðstoðardeildarstjóra og gegndi henni til dánardags. Samhliða starfi sínu á Landspítalanum sat hún í stjórn Tilveru, samtökum um ófrjósemi, og Sjúkraliðafélagi Íslands.
Edda Þöll gekk að eiga Harald Þór Sveinbjörnsson og saman börðust þau til margra ára til þess að eignast saman barn. Reyndu þau fimm smásjárfrjóvganir en án árangurs. Það var svo loks í nóvember 2019 sem þau eignuðust unga dóttur sína. Þremur mánuðum síðar greindist Edda með krabbamein.
Hera, móðir Eddu, minnist dóttur sinnar með mikilli hlýju í minningargrein í Morgunblaðinu í dag. „Elsku Edda mín, það er sárt og sorglegt að þurfa að skrifa þessar línur um þig. Það er svo stutt síðan þú varst hjá okkur í kvöldmat með litlu dúllunni þinni. Allt var svo bjart og gott, allt lífið fram undan. Þú búin að sigrast á erfiðu krabbameini eftir langa og stranga baráttu,“ segir Hera.
Móðirin segir að skyndilega hafi krabbameinið látið á sér kræla á ný og í þeirri baráttu hafi meinið tekið yfirhöndina þrátt fyrir hetjulega baráttu. „Ég mun alltaf minnast þín sem yndislegu, ljúfu, fallegu stelpunnar minnar, að utan sem innan, og mun endalaust sakna þín og alls þess sem við áttum og gerðum saman.“
Unnur Þóra, vinkona Eddu, á erfitt með að lýsa sársaukanum. „Ó Edda! Elsku besta yndislega, einlæga, falllega og klikkað vinkona mín sem ég elska svo mikið. Það er sárara en orð fá lýst að þurfa að kveðja þig. Nú þegar lífið er loksins rétt að byrja!,“ segir Unnur.
Vinkonan segir það hafa verið heldur betur kjaftshögg þegar Edda greindist fór inn á spítala í annað sinn með krabbamein. „Ég er svo fegin að hafa fengið tíma með þér eftir að þú greindist aftur og það skiptir mig öllu máli að hafa náð að kveðja þig. Ég er og verð að eilífu þakklát fyrir okkar fallegu vináttu. En ég fæ hlýtt í hjartað þegar ég hugsa um allar minningarnar okkar. Það er ósanngjarnt á allan hátt að þurfa að kveðja þig svona snemma en fallegt að hugsa til þess að þú hafir fengið að verða mamma og að Hera Lind hafi átt bestu mömmu í öllum heiminum. Þangað til næst. Þín vinkona.“
Útför Eddu fer fram frá Seltjarnarneskirkju í dag klukkan 13. Streymt verður frá útförinni og má nálgast hlekk hér.
Athugasemdir