Rithöfundurinn og blaðamaðurinn Jónína Michaelsdóttir lést þann 17. maí á Landakoti, 78 ára að aldri.
Jónína átti farsælan starfsferil að baki, en hún starfaði meðal annars sem framkvæmdastjóri samtakanna Viðskipti og verslun og var formaður Bókmenntakynningarsjóðs og kynnti íslenskar bókmenntir erlendis. Sjálf skrifaði hún sex bækur, þeirra á meðal eru æviminningar Þuríðar Pálsdóttur óperusöngkonu og Tove Engilberts.
Þá starfaði hún líka við sjónvarpsþættina Maður er nefndur sem sýndir voru á RÚV.
Jónína sinnti einnig margvíslegum störfum í þágu Sjálfstæðisflokksins, sat í nefndum og stjórnum flokksins.
Systur Jónínu minnast hennar með miklum hlýhug í Morgunblaðinu í dag. Þar segir að Jónínu hafi verið gert að ganga yngri systkinum sínum í móðurstað þegar hún var 16 ára gömul. Þegar systir hennar spurði hana í seinni tíð hvort hún hafi ekki verið sár eða reið yfir því að hafa þurft sjá um uppeldið og heimilið, hafi hún svarað nei þvert á móti. Þetta hafi verið eitt það skemmtilegasta verkefni sem hún hafi fengið í lífinu sem hafi gefið henni ómælda ánægju og gleði.
„Við systur fáum aldrei fullþakkað elsku Ninnu atlætið, umhyggjuna og ástina sem hún gaf okkur í svo ríkum mælu. Það er ríkidæmi okkar í lífinu að hafa átt hana sem systur, móður og vin og einstaka fyrirmynd í öllum þessum hlutverkum.“
Systurdóttir Jónínu segist alltaf hafa geta leitað til hennar með hvaða vandamál sem var. Hún hafi með sinni einstöku hógværð og jafnaðargeði alltaf látið henni líða vel í návist sinni og hún geta sagt henni allt sem lá henni á hjarta.
„Í kjölfarið gat maður verið viss um að fá bestu ráðin út í lífið frá henni.“
Segist hún hafa verið heppin að eiga svo góða móðursystur sem virkilega vildi sitja með henni og þær rætt saman eins og vinkonur.
„Elsku Ninna frænka, ég er svo þakklát fyrir þig og mun taka alla þá visku sem þú deildir með mér út í lífið.“
„Einn af stærri vinningum í mínu lífi var að örlögin skyldu færa okkur Ninnu saman,“ skrifar vinkona Jónínu. Hún lýsir henni sem glæsilegri og virðulegri heimskonu sem bjó yfir mikilli visku og víðsýni og segir hana hafa verið ein greindasta kona sem hún hafi hitt.
Athugasemdir