Alma Hafsteinsdóttir, formaður áhugafólks um spilafíkn, fékk nýlega í hendur bankayfirlit frá manni sem hafði tekið út 15 milljónir á 18 mánuðum í posum í sjoppum. Enginn steig inn í ferlið og gerði athugasemdir. „Það er öllum fullljóst sem koma að þessu að þetta er fullkomin geðveiki. Það er ekkert heilbrigt við þetta,“ segir Alma í nýjasta þætti Dagmála á mbl.is
Lagt hefur verið fram á Alþingi frum varp um bann við spilakössum. Frumvarpið kemur frá þeim Ingu Sæland og Guðmundi Inga Kristinssyni í Flokki fólksins.
Ekki loðmæltur né reikull
Spilafíkn er ólík áfengis- eða vímuefnafíkn að því leyti að einkennin bera menn síður utan á sér. Það eru heldur ekki til nein blóðpróf til að ákvarða á hvaða stigi spilafíknin er. Spilafíklar líta yfirleitt eðlilega út allt þar til seinni stigum sjúkdómsins er náð. Spilafíkillinn er ekki loðmæltur eða reikull í spori. Hann getur sannfært sjálfan sig og aðra um að hann sé aðeins í tímabundnum peningavanda sem brátt muni lagast, segir á vef SÁÁ.
Ennfrem kemur fram að um það bil 2 – 5 prósent af þeim sem leggja undir í fjárhættuspilum séu haldnir sjúklegri spilafíkn. Spilafíkn geti þjakað fólk af báðum kynjum, á öllum aldri og sama hver staða þeirra er eða fjárhagsgeta. Á Íslandi er boðið upp á stuðning og meðhöndlun við spilafíkn í gegnum sjálfshjálparhópa sem starfa samkvæmt 12 spora kerfinu.
Tap upp á 360 þúsund á klukkutíma
Alma kallar á að að stjórnvöld taki á vanda spilafíkla en nýverið skilaði Landlæknisembættið inn umsögn um frumvarpið og kemur fram í því áliti að embættið styður frumvarpið og vísar meðal annars til þess að Norðmenn hafi bannað spilakassa árið 2007.
Alma segir að spilakassar séu í algerum sérflokki þegar kemur að ágengum fjárhættuspilum. Hún nefnir sem dæmi að spilafíkill geti tapað 360 þúsund krónum á klukkutíma í spilakössum sem reknir séu af virðulegum stofnunum og samtökum á við Rauða krossinn, Landsbjörgu og Háskóla Íslands.
„Þetta er eins og seinni Metoo-byltingin enda þessi samtök og stofnanir ígildi „góðu strákanna,“ segir Alma.
Athugasemdir