Skip Hafrannsóknarstofnunar, Árni Friðriksson, leggur í mjög sérstæðan leiðangur suður á Reykjaneshrygg eftir helgi. Auk áhafnar er um borð vísindafólk á vegum ROCS rannsóknarsetursins (Rannsóknarsetur Margrétar Danadrottingar og Vigdísar Finnbogadóttur um haf, loftslag og samfélag). Vísindafólkið, sem er frá Danmörku og Íslandi, hyggst safna borkjarnasýnum úr hafsbotni auk þess sem sýni verða tekin úr sjó. Carlsbergsjóðurinn fjármagnar rannsóknarstarfið ásamt íslenksa ríkinu og Rannís.
Að sögn Dr. Arndísar Bergsdóttur safnafræðings, nýdoktors við ROCS og verkefnastýru setursins á Íslandi, er tilgangur leiðangursins að safna gögnum sem verða greind með alveg nýrri DNA tækni. Þannig verði hægt að draga upp mynd af samsetningu heilla vistkerfa þúsundir ára aftur í tímann og hvernig þau hafa tekið breytingum í samhengi við breytingar á loftslagi.
Arndís hefur hingað til ekki farið á sjó nema með ferjum. Hún segir umhverfismálin vel þess virði að vísindamennirnir stígi út fyrir þægindarammann. Aðspurð svarar hún að ekki sé ólíklegt að landkrabbar um borð verði sjóveikir en það verði bara að hafa það.
„Ef umhverfismálin kalla á nokkrar gusur þá verður bara svo að vera,” segir hún.
„Mestu skiptir að taka þátt í þessum merkilega leiðangri og vera hluti af samstarfshópi sem er skipaður vísindafólki í fremstu röð”.
Athugasemdir