„Það virðist svo vera að bílar séu að bila oftar í göngunum en uppi á þjóðvegi. Við höfum enga hugmynd um af hverju það gerist en það er vissulega verðugt rannsóknarefni. Reyndar gefur enginn tommu eftir í hraðanum í göngunum en ég veit ekki hvort það tengist þessu. Ég myndi taka nánari skoðun á því fagnandi,“ segir Hermann Snorri Jónsson, yfirverkstjóri hjá Vegagerðinni.
Ofangreind mynd var tekin af starfsmanni Mannlífs sem sat föst í röðinni við göngin í morgun.
„Það bilaði bíll í morgun sem olli tæplega hálftíma töf og í gær bilaði annar með hestakerru. Þetta eru alltaf nokkur atvik í mánuði sem stoppa allt. Og stundum vilja slysin því miður gerast,“ segir Hermann.
Hann segir Vegagerðina vera með samning við viðbragðsaðila á Akranesi sem sé snöggur á staðinn með dráttarbíl. „Við reynum að fjarlægja viðkomandi bíla sem fyrst en leggjum auðvitað áherslu á að gæta fyllsta öryggis, jafnt fyrir ökumenn og viðbragðsaðila. En þeir þurfa auðvitað að fá tíma til að athafna sig og þá vilja raðirnar skapast“.
„Við erum stöðugt að vinna í því að bæta öryggismálin og koma þeim í sem allra bestan farveg,“ segir Hermann.
Athugasemdir