Hríðlækkandi fæðingartíðni á Íslandi er rannsóknarefni Sunnu Símonardóttur, nýdoktors og aðjúkt í félagsfræði við Háskóla Íslands en hún leitar kvenna sem velja að eignast eitt barn. Í viðtali við MBL segir Sunna að ekki sé vitað af hverju fólk velji að eignast færri börn en á árum áður en undanfarin tíu ár hafi fæðingartíðni lækkað mjög á Íslandi.
Sunna, sem er nýdoktor og aðjúnkt í félagsfræði við Háskóla Íslands, leitar að konum sem völdu að eignast eitt barn, þar sem fæðingartíðni hafi lækkað mikið á Íslandi og leitast hún eftir að útskýra það. „Það sem mig langaði að gera er að skyggnast í ástæður þar að baki. Ég tala við einstaklinga til þess að fá þeirra upplifun, reyni að kortleggja þá aðeins. Hvaða ástæður og samfélagslegu breytingar, hugmyndafræðilegu breytingar er að baki svona stórum breytingum í samfélaginu?“ Þá veltir Sunna upp spurningum á borð við hvaða samfélagslegu og menningarlegu hugmyndir um móðurhlutverkið séu ríkjandi í dag. „Hvað felst í því að vera góð móðir? Hvernig eiga mæður að vera, haga sér og hugsa?“
Þá segir hún einnig val kvenna um barneignir birtast á marga vegu. Að sífellt fleiri konur velji að ljúka námi og hrinda af stað eigin starfsferli áður en hugað er að móðurhlutverkinu. „Mér finnst ekki endilega rétt að stilla því þannig upp að konur séu ekki meðvitaðar um að það sé ekki endilega hægt að eignast þrjú börn eftir fertugt. Ég held að þetta sé val hjá flestum.“ Þeir samfélags- og menningarlegu þættir sem hafi áhrif á val sömu kvenna sé verðugt rannsóknarefni. „Er það að konur upplifa að þær muni einfaldlega ekki ná að gera allt sem þær langar til að gera með stóra fjölskyldu? Er meiri einstaklingshyggja í samfélaginu? Viðhorf til fjölskyldunnar er kannski að breytast?“
Sandra Kristín Jónasdóttir, nemi, vinnur að rannsóknarverkefninu ásamt Sunnu en þær hlutu nýverið styrk frá Nýsköpunarsjóði Námsmanna. Þær mæður sem eru á aldrinum 25 til 45 ára geta allar tekið þátt í rannsókninni og eru hvattar til að senda póst á [email protected]
Athugasemdir