Sigurbjörn Bjarnason lenti í hrikalegri lífsreynslu fyrr í mánuðinum þegar hjarta hans stöðvaðist í heilar ellefu mínútur vegna stíflaðrar æðar.
Sigurbjörn er 55 ára gamall búfræðingur og rafvirki sem búsettur er í Lillestrøm í Noregi.
Hann segir svo frá:
„Þetta byrjaði með því að ég fékk mikla verki í báða handleggi, bringu og bak og neðri kjálka.“ Um nóttina vaknar Sigurbjörn með svipaða verki en margfalt verri.
Þá greip sambýliskona hans, hin rúmenska Gianina Calugaru, inn í og hringdi á sjúkrabíl.
Sigurbjörn var þá orðinn verulega verkjaður þegar norsku sjúkraflutningamennirnir mættu á svæðið og urðu viðstaddir þegar hjartað hætti að slá; þar sem Sigurbjörn sat í sófanum stoppar hjartað klukkan 04:42 og en komst í gang ellefu mínútum síðar: „Þannig að ég var ellefu mínútur á einhverju bölvuðu flakki.“
Sigurbjörn segist ekki muna neitt eftir þessu; hann datt alveg út þessar ellefu mínútur þar sem hann flakkaði um í „Sumarlandinu.“
Rafvirkinn lífsglaði segir að eftir þessa hrikalegu lífsreynslu eigi hann ekki að forðast neitt nema heimsku og til heimsku teljast reykingar; hann hefur endanlega drepið í síðasta líkkistunaglanum.
Og hann er bjartsýnn, jákvæður og lífsglaður, hann Sigurbjörn, og feginn að hafa fengið framlengingu á jarðvist sinni því „nær dauðanum verður ekki komist.“
Athugasemdir