Tryggingastofnun ber skylda til að upplýsa um nöfn þeirra starfsmanna sem standa að ávörðunum stofnunarinnar svo sem örorkumati, hverju sinni. Þetta er álit umboðsmanns Alþingis. Stofnunin hefur leynt nöfnum starfsfólks til að vernda það gagnvart öryrkjum og öðrum þeim sem eiga hagsmuni sína undir stofnuninni. Því er haldið fram að starfsfólk hafi íitrekað orðið fyrir hótunum og verið áreitt eftir að teknar hafa verið ákvarðanir sem varða skjólstæðinga stofnunarinnar. Morgunblaðið segir frá þessu í dag.
Úrskurðurinn kemur í kjölfar þess að maður kvartaði til umboðsmanns Alþingis yfir því að umfjöllun og ákvörðun Tryggingastofnunar um örorkumat hans hefðu verið nafnlaus. Í þeim skjölum kæmu ekki fram nöfn þeirra starfsmanna sem stóðu að baki þeim.
Í skýringum Tryggingastofnunar til umboðsmanns var meðal annars vísað til þess að ákveðið hefði verið að hætta að birta nöfn starfsmanna við afgreiðslu mála vegna þess að stofnunin hefði talið nauðsynlegt að grípa til aðgerða til að vernda starfsfólk hennar. Þá nyti það persónuverndar lögum samkvæmt. Viðskiptavinir Tryggingastofnunar eru flestir þeir sem eiga erfiðast uppdráttar í samfélaginu og búa við lökust kjör.
Umboðsmaður áréttar að það hafi grundvallarþýðingu út frá réttaröryggi að tilgreina nöfn þeirra starfsmanna sem stæðu að ákvörðun. Þannig gæfist málsaðila til dæmis færi á að ganga úr skugga um að viðkomandi starfsmenn væru hæfir til að taka slíkar ákvarðanir, auk þess sem það hefði grundvallarþýðingu til að hann gæti metið hvort aðstæður væru með þeim hætti að efast mætti um hæfi starfsmanns.
Athugasemdir