Íris þverneitar ásökunum um einelti: „Þessar ásakanir eru tilhæfulausar og órökstuddar með öllu“

Í grein Mannlífs í gær var sagt frá því að Andrés Þor­steinn Sig­urðs­son yfir­haf­sögu­maður Vest­manna­eyja­hafnar hafi sagt starfi sínu lausu vegna meints ein­eltis í garð hans af hálfu Írisar Róberts­dóttur bæj­ar­stjóra Vest­manna­eyja­bæjar.

Mannlíf náði tali af Írisi og spurði hana hvort það væri satt að Andrés Þor­steinn Sig­urðs­son yfir­haf­sögu­maður Vest­manna­eyja­hafnar hafi sagt starfi sínu lausu vegna meints ein­eltis hennar í garð hans.

Íris var ákveðin í svörum sínum og sagði ásak­anir Andrésar á hendur sér vera ósannar og hreinar dylgjur og rang­indi:

„Þessar ásak­anir eru til­hæfu­lausar og órök­studdar með öllu,“ segir Íris og bætir við:

„Við­kom­andi starfs­maður var meðal umsækj­enda um starf hafn­ar­stjóra fyrr á árinu, en fékk ekki starfið. Fram­kvæmda- og hafn­arráð réð annan ein­stak­ling í starfið, sem það mat hæf­ari en Andrés.“

Íris tekur með öllu fyrir að hún hafi á ein­hvern hátt komið nálægt ráðn­ing­ar­ferl­inu:

„Ég kom hvergi nálægt því ferli, enda er það ekki á verk­sviði bæj­ar­stjóra. En í kjöl­far þess að hann fékk ekki starfið virð­ist hann hafa ákveðið að ráð­ast að mér per­sónu­lega með órök­studdum dylgjum sem ég vísa algjör­lega á bug,“ sagði Íris að lokum.