Dómsmálaráðherra, Áslaug Arna Sigurbjörnsdóttir, hefur formlega beðið Björn Jón Bragason og Sigurð K. Kolbeinsson afsökunar.
Ástæðan er framganga ráðuneytisins gagnvart félögunum; fyrr á þessu ári komst umboðsmaður Alþingis að þeirri niðurstöðu að bréf sem Haraldur Johannessen, fyrrverandi ríkislögreglustjóri hefði sent þeim félögum hefði stangast á við skyldur hans í embættinu. Auk þess hafi aðgerðir dómsmálaráðuneytisins í málinu verið óviðunandi.
Málið nær fimm ár aftur í tímann; þá voru Björn Jón og Sigurður boðaðir á fund með einstaklingi sem sagðist vera fyrrverandi rannsóknarlögreglumaður, en á fundinum áttu einnig að vera Haraldur ríkislögreglustjóri og Alda Hrönn Jóhannsdóttir fyrrverandi saksóknari efnahagsbrotadeildar ríkislögreglustjóra.
Umfjöllunarefni fundarins átti að snúa að umfjöllun Björns Jóns um fund sem haldinn var árið 2011, og varðaði framtíð efnahagsbrotadeildar ríkislögreglustjóra. Sú umfjöllun birtist í bókinni Gjaldeyriseftirlitið eftir Jón Björn sem kom út árið 2016.
Í áðurnefndri afsökunarbeiðni frá Áslaugu Örnu segir meðal annars að „í samræmi við niðurstöðu umboðsmanns Alþingis og erindi yðar til ráðuneytisins, telur ráðuneytið rétt að rétta hlut yðar með því að biðjast afsökunar á því hvernig til tókst varðandi bréfaskriftir embættis ríkislögreglustjóra til yðar,“
Samkvæmt heimildum Mannlífs er Björn Jón sáttur og málinu af hans hálfu því lokið.
Athugasemdir