„Þetta er fjölmiðill sem mikil eftirspurn er eftir í dag,“ segir Margrét Friðriksdóttir sem ásamt fleirum stendur fyrir útgáfu nýs netmiðils, frettin.is, sem mun koma út 1. september. „Ég fékk þessa hugmynd í fyrra og loksins er þetta komið í framkvæmd. Það hafa verið pínu vandræði en þetta var skemmt fyrir mér tvisvar sinnum varðandi húsnæði og það var ráðist á menn sem ætluðu að vera með mér í þessu sem er mjög merkilegt. Það er nokkuð ljóst að það eru einhverjir hárkarlar þarna úti sem vilja ekki opna umræðu um viss málefni.“
Margrét segir að íslenskir fjölmiðlar hafi tekið þátt í þöggun varðandi ýmis málefni og að slíkt eigi ekki að líðast í lýðræðislegu samfélagi þar sem tjáningarfrelsi og skoðanafrelsi séu hornsteinarnir. „Það er brot á stjórnarskrá að þagga niður tjáningarfrelsið og það er líka brot á fjölmiðlalögum að vera hlutlægur miðill og þagga vísvitandi niður viss málefni. Þessi miðill er að fara að taka á því og við munum birta það sem aðrir hafa neitað að birta og reynt að þagga niður.“
Margrét segir að um ýmis málefni sé að ræða sem og falsfréttir eins og til dæmis varðandi Covid, loftslagsmál, innflytjendamál og hinsegin mál. „Það er auðvitað mikilvægt að tala um þessi mál en þetta er voðalega mikið ein hlið og aðrar hliðar fá ekkert að koma og ef einhver er á annarri skoðun þá er þaggað niður í viðkomandi, svokallað „cancel culture“ eða útskúfunarmenning. Við sem komum að miðlinum teljum það vera mjög hættulega þróun. Við munum birta aðrar hliðar líka þar sem okkur finnst umræðan á Íslandi vera mjög einsleit og okkur þykir það vera miður.“
Þessi miðill er að fara að taka á því og við munum birta það sem aðrir hafa neitað að birta og reynt að þagga niður.
Hefði átt að kjósa um byggingu moskunnar
Margrét nefndi Covid. „Það áhugaverðasta er að fólk er að veikjast alvarlega eftir bólusetningar; það virðist sem ónæmiskerfið sé hrunið hjá mörgum sem fá hjartavandamál, blæðingar og konur hafa misst fóstur. Fólk þorir einfaldlega ekki að stíga fram af ótta við að vera kallað „anti vaxer“ þótt það sé mjög veikt. Þetta er táknrænt fyrir ástandið í þjóðfélaginu. Mér finnst þessi höft vera algerlega galin að mörgu leyti og ég skil ekki hvernig nokkur maður getur tekið mark á þessu lengur vegna þess að þetta fólk sem er í framvarðasveitinni talar bara í hringi. Þetta er komið út í algera vitleysu og það eru margir orðnir þreyttir á þessu rugli. Hér eru ströngustu reglur í Evrópu að mér skilst og mér finnst það vera skaðlegt að vera að loka heilbrigt fólk inni. Ég veit að það er átta til níu mánaða bið á Kvíðameðferðarstöðinni fyrir unglinga og ungt fólk og sjálfsmorð hafa aukist um 30% á tímum Covid. Það eiga margir erfitt með félagslega einangrun. Þetta er allt gert í ljósi þess að vernda viðkvæma hópa og fólk með undirliggjandi sjúkdóma. Það er alveg vitað að börn, ungt fólk og hraust fólk er ekkert að veikjast alvarlega af þessu. Það er allavega sjaldgæft og rannsóknir hafa sýnt fram á það. Því miður hefur annað komið á daginn varðandi bólusetningarnar; það hafa um 10 manns lamast hér á landi vegna þeirra og einnig 30 andlát í kjölfar bólusetningar og þetta er svolítið þaggað líka. Þannig að persónulega vil ég frekar að ég og og börnin mín fáum frekar kvefpest heldur en að lamast eða fá blóðtappa í kjölfar bólusetningar því afar litlar líkur eru á að ungt og hraust fólk veikist alvarlega af þessu samkvæmt rannsóknum,“ segir Margrét sem ekki lét bólusetja sig.
Margrét nefndi líka útlendingamál. Hún hefur verið með ákveðnar skoðanir varðandi innflytjendamál og er spurð um skoðun sína á því að byggingar- og skipulagsyfirvöld í Reykjavík samþykktu á þriðjudag að leyfa Félagi múslima á Íslandi að byggja tveggja hæða bænahús við Suðurlandsbraut 76.
„Mér finnst að svona mál eigi að vera í höndum borgarbúa og að þeir eigi að fá að kjósa um svona stór málefni. Ég er hlynnt beinu lýðræði og hef talað fyrir því.“ Hún segir það eiga eftir að koma í ljós hvort og þá að hvaða leyti bygging moskunnar muni hafa áhrif. „Mér hefur alltaf þótt vera viturlegt að læra af öðrum sem hafa reynsluna eins og til dæmis hvað varðar nágrannalönd okkar; Danmörk, Svíðþjóð og Noreg. Því miður hefur innflytjendastefnan brugðist í þessum löndum sem eru farin að herða til muna sín innflytjendalög vegna vandamála þessu tengdu.“
Pabbi svipti sig lífi árið 1995 þegar ég var að verða 18 ára og mamma lést svo árið 2013 eftir skammvinn veikindi.
Margrét hefur í gegnum árin tjáð skoðanir sínar umbúðalaust og þykir hafa munninn fyrir neðan nefið. Hún stofnaði Stjórnmálaspjallið á sínum tíma, Facebook-hóp þar sem fólk getur viðrað skoðanir sínar, og hún segist halda að það sé innbyggt í sér að hafa áhrif. „Ég hef alltaf verið félagslynd, opin og frjálslynd manneskja og mér finnst vera mikilvægt að það sé rætt um hlutina. Ég ólst upp við það að fólk gat skipst á skoðunum. Það er í lagi að vera ósammála og ef fólk er það ekki í dag þá er það bara útilokað og barið jafnve lniður með andlegu ofbeldi og mér finnst það vera slæm þróun. Fólk er hrætt við að lenda í dómstóli götunnar bara fyrir það að vera með skoðanir.“
Mestu áföllin í lífi Margrétar mótuðu hana og gerðu hana sterka. „Ég kom að báðum foreldrum mínum látnum. Pabbi svipti sig lífi árið 1995 þegar ég var að verða 18 ára og mamma lést svo árið 2013 eftir skammvinn veikindi. Þetta hefur náttúrlega mótað mig mikið og gert mig að þeirri persónu sem ég er í dag. Ég er mjög sterk og sjálfstæð kona og ég mun aldrei láta þagga niður í mér. Einnig hafa ferðalög til framandi landa mótað mig mikið en ég bjó til að mynda í Indlandi í tæpt ár, Japan í fjóra mánuði og hef ferðast um Austurlönd fjær og nær þar sem framandi menning er og allt öðruvísi en á Íslandi. Feðraveldið ræður enn ríkjum í mörgum af þessum löndum og sorglegt að sjá hvað sumir eru aftarlega á merinni hvað varðar kvenfrelsi sem við erum svo vön hér á landi. Og síðast en ekki síst þá hefur auðvitað mótað mig heilmikið að vera móðir yndislegra stúlkna sem ég er svo blessuð að hafa eignast og eru í dag 18 og 15 ára gamlar og erum við mæðgur miklar vinkonur og erum duglegar að ferðast saman og alltaf að bæta í minningarbankann sem er svo dýrmætur.“
Athugasemdir