Guðbjörn Guðbjörnsson, yfirtollvörður, óperusöngvari og fyrrum Sjálfstæðismaður tilkynnir í stöðuuppfærslu á Facebook í gær að hann sé aftur genginn í Sjálfstæðisflokkinn, eftir að hafa yfirgefið flokkinn með látum fyrir um tíu árum síðan, eins og hann orðar það sjálfur.
„Ég varð afhuga honum árið 2009“
Í viðtali við DV árið 2017 lýsir Guðbjörn hvernig hann hafi fengið nóg af Sjálfstæðisflokknum.
„Ég er svona miðju-hægri maður og karlremba í eðli mínu, gat og get bara ekkert að því gert. Ég var mjög virkur í flokknum, var í öllum hugsanlegum ráðum og nefndum og taldist til ESB-sinna flokksins. Árið 2004, þegar Davíð Oddsson ætlaði í að keyra í gegn fjölmiðlafrumvarpið sitt, þá komu fyrstu brestirnir í sannfæringuna hjá mér. Síðan kom hrunið og þá fengu margir nóg af flokknum. Ég varð afhuga honum árið 2009,“
Guðbjörn hélt áfram og sagðist hafa orðið fyrir einelti og ofsóknum í Sjálfstæðisflokknum.
„Sjálfstæðisflokkurinn er ótrúlega áhrifamikill í kerfinu. Hann á eiginlega lögregluna, dómstólana og 60-70% allra forstöðumanna stofnana.
Þetta kerfi allt saman – ég vil ekki segja að það sé spillt – heldur að það sé dofið og gegnsýrt af karlrembu. Það er líka mikil samtrygging í því.
Ég veit fyrir víst og af eigin reynslu að það er erfitt fyrir þá sem eru í kerfinu að koma fram með gagnrýni hvað þessa karlrembu-afstöðu Sjálfstæðisflokksins varðar, því kerfið hefnir sín á þeim og hótar þeim öllu illu. Hef meira sjálfur orðið fyrir slíku einelti og ofsóknum fyrir skoðanir mínar og ummæli.
Sjálfstæðisflokkurinn eins og hann er í dag er í raun meinsemd í samfélaginu!“
Þetta kerfi allt saman – ég vil ekki segja að það sé spillt – heldur að það sé dofið og gegnsýrt af karlrembu
Snýr aftur
Eineltið og ofsóknirnar virðist Guðbjörn vera búinn að fyrirgefa og snýr, að því er virðist, ódeigur aftur í flokkinn.
„Það tilkynnist hér með formlega og opinberlega að ég er á ný genginn í Sjálfstæðisflokkinn eftir að hafa yfirgefið þann ágæta flokk með látum fyrir um 10 síðan, en ég hafði þá verið liðsmaður X-D frá unglingsaldri eða í 35 ár.“
Guðbjörn segist því aftur kjósa Sjálfstæðisflokkinn, eitthvað sem hann hefur ekki gert síðan 2009.
„Ég er því aftur kominn heim og hægt að slátra alikálfinum og halda í Valhöll veislu,“ skrifar Guðbjörn.
Átti ekki heima í Viðreisn
Í stöðufærslunni segist Guðbjörn hafa komið að stofnun Viðreisnar, en síðar komist að því að hann ætti ekki lengur heima í þeim flokki.
„Ég kom lítillega að stofnun Viðreisnar á sínum tíma með frábæru og yndislegu hugsjónafólki úr Sjálfstæðisflokknum. Undanfarin 2-3 ár fór ég að taka eftir því að áherslur Viðreisnar höfðu breyst mjög mikið og mjög hratt. Framkoma Viðreisnar gagnvart stofnanda flokksins, Benedikt Jóhannessyni, sýndi mér síðan endanlega að ég ætti ekki heima í þeim félagsskap og ákvað því að kveðja Viðreisn endanlega.“
Þá hafi hann velt því fyrir sér hvort hann gæti stutt Framsóknarflokkinn eða Miðflokkinn.
En segir hegðun Miðflokksins gagnvart Þorsteini Sæmundssyni og Ólafi Ísleifssyni hafa fælt sig frá þeim flokki.
Allir aðrir flokkar, sem eru enn vinstrisinnaðri, koma ekki til greina. Langsamlega „skásti“ kosturinn er því óneitanlega gamli góði Sjálfstæðisflokkurinn með öllum sínum göllum en þó verður að segjast einnig með heilmörgum kostum.
Hægri menn: Snúum saman bökum og hættum að láta smávægilegan ágreining leiða til þess að hægri menn séu í 2-3 stjórnmálaflokkum og tryggjum örugglega X-D hægri ríkisstjórn 2021-2025.
Hægri menn: Enga pólitíska tilraunastarfsemi vinstri manna á tímum óvissu og óróleika heldur styrka og örugga stjórn X-D öllum landsmönnum til góða.
Hægri menn: Þéttum raðirnar og náum 35-40% atkvæða í næstu kosningum, því þannig og aðeins þannig náum við að koma baráttumálum okkar í höfn, skrifar Guðbjörn að lokum.
Athugasemdir