Fararstjórinn og fyrrum blaðamaðurinn Páll Ásgeir Ásgeirsson segir í Facebook-færslu að „um þessar mundir eru 10 ár síðan Eyfellingar fóru að reka fé aftur upp á Almenninga norðan Þórsmerkur þvert á ráðgjöf vísindamanna sem töldu afréttinn ekki beitarhæfan.
Engin girðing er lengur milli Almenninga og Þórsmerkur sem gerir fénu kleift að sækja inn á Þórsmörk sem er friðuð fyrir allri beit,“ og nefnir Páll að „á þessum 10 árum hefur fé sem gengur á Þórsmörk yfir sumarið fjölgað jafnt og þétt. Undanfarin ár hafa starfsmenn Skógræktar smalað um 50 fjár út úr Mörkinni í veg fyrir safn Almenninga á smaladegi.“
Og bætir við:
„Í sumar töldu menn sig sjá fleira fé á Þórsmörk en nokkru sinni fyrr og síðastliðinn föstudag var smalað á Almenningum og til stóð að Skógræktarmenn smöluðu Þórsmörk að vanda en að þessu sinni átti að telja féð betur en oft áður. Bændur brugðust við þessu með því að smala í kyrrþey út úr Þórsmörk degi fyrr svo enginn gæti talið féð sem gengur sjálfala á friðuðu skógræktarsvæði.“
Páli finnst þetta benda til þess að bændur kæri sig ekki um talningu.
„Mér skilst að Eyfellingar hafi leyfi til að hafa allt að 180 fjár á Almenningum hvert sumar en undanfarin ár hefur leikið grunur á að fleira fé sé rekið inn eftir en heimilt er. Þessi sérstæða smalamennska bændanna á Þórsmörk bendir óneitanlega til þess að þeir kæri sig ekki um neina talningu.“
Hann nefnir einnig að það sé undarleg tímaskekkja og í raun „mjög sorglegt að Skógræktin sem í nærri heila öld hefur starfað að uppgræðslu og ræktun á Þórsmörk skuli standa varnarlaus gagnvart rányrkju og yfirgangi fáeinna frístundabænda undan Eyjafjöllum.
Sú rányrkja sem bændur hafa stundað á Almenningum undanfarin 10 ár hefur nú færst í auknum mæli yfir á Þórsmörk þar sem að minnsta kosti 50 kindur bíta skóginn hvert sumar án þess að vörnum verði komið við. Það er alger óhæfa að þessi vinnubrögð skuli líðast á tímum loftslagsbreytinga þar sem allir keppast við að leggja sitt af mörkum að þá skuli Skógrækt ríkisins þurfa að verja hendur sínar fyrir frekum bændum og blikksmiðum undan Eyjafjöllum.“
Athugasemdir