Nýja fjallið sem er að rísa undan gosgígnum í Geldingadölum stefnir að óbreyttu í að verða hæst fjalla á Reykjanesi. Gígurinn er kominn upp í 334 metra yfir sjávarmáli og vantar því aðeins 20 metra til að toppa nágrannann, Stóra Hrút sem er 354 metrar að hæð. Hæsta fjall á svæðinu er Grænadyngja sem er 393 metrar að hæð. Höfuðdjásn Reykjaness, Keilir, mælist vera 383 metrar að hæð eða samsvarndi hæsta tindi Fagradalsfjalls. Trölladyngja rís 375 metar yfir sjávarmáli. Með svipuðu framhaldi mun Gemlingur, eins og smur kalla tindinn til heiðurs Stóra Hrúti, verða hæsta fjallið á svæðinu og í rauninni veit enginn hvar þessi ósköp enda. Fjöll á borð við Skjaldbreið urðu einmitt til í gosi.
Undanfarinn mánuð hefur hraunið staflast meira upp í stað þess að leita leiða niður eftir svæðinu. Geldingadalir eru þegar fullir og vel hefur safnast í Merardali. Þá hefur mikið hraun safnast í Nátthaga þangað sem mikill hraunelfur rennur.
Haldi þessi þróun áfram næstu mánuðina mun landslag Reykjaness gjörbreytast. Reyndar hefur það þegar breyst þar sem sjá má hinn nýja tind víða að á Reykjanesi. En það getur enginn séð fyrir framvinduna. Gosið gæti allt eins stöðvast á næstunni og Stóri Hrútur, Keilir og Grænadyngja haldið hæðarmetum sínum.
Athugasemdir