Faðir Völu bjó á götunni í 20 ár: „Hann var veikur og fékk ekki lækningu í kerfinu við því“

Gestur Guðnason, tón­list­ar­maður, bjó á göt­unni í tutt­ugu ár.
Hann var rúm­lega fer­tugur þegar hann fór á göt­una og þar bjó hann þangað til hann dó sum­arið 2019.

Dóttir Gests, Vala Sólrún, var í við­tali við Smartland nú um helg­ina.

Engin úrræði til fyrir fólk eins og Gest

Faðir hennar glímdi við alkó­hólista og segir Vala að ekki sé til úrræði fyrir fólk eins og Gest, föður hennar.
Hún seg­ist hafa upp­lifað að sífellt væri verið að reyna losa sig við hann og henni sagt að hann væri of veikur fyrir kerfið.

„Ég elskaði pabba mjög mikið og hann elskaði mig. En hann var veikur og fékk ekki lækn­ingu í kerf­inu við því,“ segir Vala. Þá segir Vala að sam­fé­lag­inu skorti rétt verk­færi til að aðstoða veikasta fólkið okkar.

„Ég veit að allir voru að gera sitt besta tengt pabba, en við getum ekki fylgst með þessum mála­flokki feta áfram sama veg. Það er of sárt fyrir okkur aðstand­end­urna og eins er sam­fé­lagið bara of lítið til þess.“

„Pabbi átti enga rödd. Hann var brotinn þegar hann fór á götuna.“

Vala segir föður sinn hafa verið einan og hræddan áður en hann dó.

Að mati Völu staf­aði ótti hans af því að hann hafði ekki stjórn á eigin lífi eða aðstæðum og valdi sér ekki það að deyja úr þessum sjúk­dómi.

„Pabbi átti enga rödd. Hann var brot­inn þegar hann fór á göt­una, en það braut hann líka ennþá meira niður hvernig var komið fram við hann þar. Við horfum ekki í augu þeirra sem búa á göt­unni og knúsum þau. Heldur horfum við undan líkt og þau séu ekki til. Þetta fólk okkar sást ekki þegar þau voru börn og þau sjást ekki þegar þau eru orðin full­orðin. Það upp­lifir stöðugt meiri nið­ur­læg­ingu í stað þess að upp­lifa stað þar sem það getur leitað aðstoðar og fengið það eina sem það vantar í líf­inu, athygli og svig­rúm til að vinna í sér með sér­fræð­ingi.“

Ljósið innra með Völu fann sér farveg

Eftir frá­fall föður síns seg­ist Vala hafa fundið kraft innra með sér og vitað fyrir víst við hvað hún vildi vinna. Vala vinnur við hljóð­heilun hjá Shalom-með­ferð­ar­stöð­inni.

„Þegar maður hefur lært að elska fólk með skugga þá verður maður ofur­næmur á skugga í öðrum. Ég held að svona reynsla geri það að verkum að maður velji að vinna í mjög björtu og fal­legu umhverfi. Þegar pabbi dó var eins og ljósið innra með mér fyndi sér far­veg. Ég vissi hvert ég vildi beina því.“