Sigrún nokkur skilur illa hvers vegna Bónus-verslanir bjóðir viðskiptavinum upp á myglað grænmeti til sölu og ljótt súpukjöt í byggingaplasti. Eftir síðustu heimsókn sína í verslunina varð hún einfaldlega orðlaus.
Sigrún segir frá upplifun sinni í fjölmennum hópi matgæðinga á Facebook, Matartips!. Við skulum gefa henni orðið:
„Ég álpaðist inn í Bónusverslun á föstudaginn og keypti þessa íslensku agúrku sem er mygluð og ónýt í dag. Ég var alveg orðlaus yfir flestu sem fyrir augu bar í ávaxta- og grænmetisdeildinni og báru þar af tveir kassar af meira og minna mygluðum appelsínum. Erindið í Bónus var hins vegar að kaupa tvo til þrjá framhryggjarbita af súpukjöti en það var ekki til og sláturtíð stendur sem hæst. Eina súpukjötið sem var á boðstólum voru fleiri fleiri kíló af ljótum, frosnum bitum í byggingaplasti. Lætur fólk bjóða sér þetta?“
Svo virðist sem fjölmargir hafi lent í svipuðu í Bónus, að minnsta kosti ef marka má hin mörgu komments sem hafa komið undir færslu Sigrúnar. Þóra hefur löngu gefist upp á búðinni. „Ég kaupi sjaldan ávexti og grænmeti í bónus akkurat vegna þess að það er myglað eða ljótt. Krónan er hinsvegar með mjög ferska ávexti,“ segir Þóra.
Tinna hefur eftur á móti lent í því sama hjá samkeppnisaðilum Bónus. „Lenti í þessu í krónunni í vikunni – hún varð mygluð á 2 dögum,“ fullyrðir Tinna.
Jóhannesi kemur þetta ekkert á óvart. „Er vandamálið semsagt að þú fórst í Bónus og það var eins og að fara í Bónus?,“ spyr Jóhannes.
Athugasemdir