Vopnað rán átti sér stað í Smárahverfi í Kópavogi um hálf átta leytið í gær. Þar veittust tveir ungir menn að konu og ógnuðu henni með hníf. Atvikið átti sér stað við heimili konunnar. Mennirnir sögðu konunni að afhenda bæði síma og peninga. Konan gerði hvorugt og hringdi á lögregluna. Mennirnir lögðu þá flótta á bifreið sinni. Lögregla hafði upp á mönnunum skömmu síðar og handtók þá.
Rétt eftir klukkan níu í gærkvöldi barst lögreglu tilkynning frá vitni að innbroti. Vitnið sá karlmann brjóta rúðu á vinnuskúr og fara inn. Þegar lögregla mætti á svæðið var maðurinn farinn. Ekki er ljóst hvort maðurinn hafi stolið einhverju úr skúrnum að svo stöddu.
Lögregla hafði afskipti af ungum ökumanni í Hlíðahverfi í nótt. Maðurinn sagði lögreglu að hann hafi ekið bíl sínum á steinstólpa og því væri bíllinn óökufær. Lögregla handtók manninn, sem grunaður var um að hafa ekið undir áhrifum áfengis og fíkniefna, og vistaði í fangaklefa. Krókur sá um að fjarlægja bílinn af svæðinu.
Rétt fyrir klukkan hálf fimm í nótt var maður handtekinn í Laugardal. Maðurinn sem var í annarlegu ástandi hafði ógnað fólki og látið illa. Hann gisti bak við lás og slá.
Sex ökumenn voru stöðvaðir vegna gruns um akstur undir áhrifum áfengis eða fíkniefna.
Athugasemdir