Önnur móðir greinir frá hugsanlegum ofskammti sýklalyfs: „Ég tek lyfjaskömmtun alvarlega.“

Önnur móðir hefur nú sett sig í sam­band við Mannlíf og greint frá því að barnið hennar hafi senni­lega lent í því að fá of sterkan skammt sýkla­lyfja bland­aðan í apó­tek­inu Apó­tek­ar­anum.

Mannlíf hefur áður fjallað um mál þar sem lyfja­fræð­ingur í Apó­tek­ar­anum í Mos­fellsbæ er sagður hafa blandað of sterkan sýkla­lyfja­skammt fyrir sautján mán­aða gam­alt barn, sem end­aði þannig að fara þurfti með barnið upp á bráða­mót­töku Barna­spít­al­ans í eitr­un­ar­próf. Barnið fékk mikla og sárs­auka­fulla sveppa­sýk­ingu í tann­holdið í kjöl­farið.

Konan sem Mannlíf hefur nú rætt við kýs að koma ekki fram undir nafni.

Hún útskýrir að sonur hennar hafi átt að fá sjö daga skammt af sýkla­lyfi. Hún hafi síðan tekið eftir því að það vant­aði einn og hálfan dag upp á skammt­inn.

Hún fékk lyfið í Apó­tek­ar­anum í Aust­ur­veri.

„Þegar ég heyri í lyfja­fræð­ingi hjá þeim þá fer hann bara í vörn og segir að lyfið komi svona til þeirra frá fram­leið­anda og þau blandi það sam­kvæmt leið­bein­ingum þaðan. Hann vildi ekki kann­ast við að hugs­an­lega hefði lyfið verið blandað vit­laust hjá þeim og að ef svo væri þá væri það ekk­ert hættu­legt. Hann sagði mér svo bara að panta tíma hjá lækni til að fá það sem vant­aði upp á,“ segir móð­irin í sam­tali við Mannlíf.

„Ég heyrði í Eitr­un­ar­mið­stöð­inni, þar sem strák­ur­inn minn var með svaka­legar pílur í mag­anum eftir þetta og hægða­tregðu – sem hann er enn með. Við end­uðum uppi á Barna­spít­ala af því að hann verkj­aði svo. Hjúkr­un­ar­fræð­ingur hjá Eitr­un­ar­mið­stöð­inni reikn­aði þetta út og sagði að hann hefði alls ekki fengið of stóran skammt af lyf­inu, þótt það hefði verið vit­laust blandað.“ Hún segir að sér hafi verið létt við að heyra það.

Aldrei áður verið með magavandamál

Seinna fór móð­irin með dreng­inn á Domus Medica, þar sem hann var enn að glíma við vanda­mál í maga.

„Læknir þar sagði mér bara að hætta að gefa honum sýkla­lyfið, sem ég gerði, en hann er enn að fá svona pílur í mag­ann.“ Hún seg­ist þó hafa velt því fyrir sér hvort um maga­kveisu væri að ræða og að þetta væri hugs­an­lega ekki eitt­hvað sem tengd­ist sýkla­lyf­inu.

Hún segir son sinn þó aldrei hafa átt við hægða­vanda­mál að stríða. Allt hafi gengið vel í þeim efnum, allt frá fæð­ingu. „Svo ég gat ekki annað en spáð í hugs­an­legum tengslum milli þess og lyfja­skammts­ins. Líka þar sem maga­kveisan kom ekki fyrr en fljót­lega eftir að hann byrj­aði á sýkla­lyfjum.“

Þarf að komast á hreint

„Á Barna­spít­al­anum náði hann að losa á meðan við biðum eftir lækni, svo við vorum bara send heim í kjöl­farið af hjúkr­un­ar­fræð­ingi þar. Það var litið svo á að þetta væri bara hægða­vanda­mál og við héldum það líka, en síðan hélt þetta áfram. Hann los­aði ekk­ert í þrjá daga í kjöl­farið og á þriðja degi náði hann að losa örlítið ásamt því að fá áfram þessar svaka­legu pílur í mag­ann.

Ég veit ekki hvað ég á að halda,“ segir móðir drengs­ins.

Hún segir að ef til vill komi í ljós að þetta geti ekki tengst ofskammti sýkla­lyfs en að það þurfi að kom­ast á hreint.

„Lækn­ir­inn á Domus tal­aði líka um að það væri orðið algengt að fá ekki réttan skammt; þann skammt sem lækn­ir­inn hefði ávísað. Hún hefði sem­sagt verið að upp­lifa það. En hún virt­ist ekki hafa neinar áhyggjur af því.“

Móðirin segir lyfja­fræð­ing­inn í apó­tek­inu hafa borið því við að hún hefði sjálf hugs­an­lega mælt þetta vit­laust fyrir son sinn eða sullað lyf­inu niður.

Hún segir það alveg af og frá. „Ég tek lyfja­skömmtun alvar­lega.“