„Dómsvald Íslenska ríkisins í kynferðisafbrotamálum hefur hér með verið dæmt vanhæft og það krefst aðgerða. Í BA-ritgerð minni Upp upp mín sál og öll mín leg hef ég skrifað opinbert uppsagnarbréf til guðs, þar sem ég var fengin frá Mannréttindadómstóli Sameinuðu þjóðanna til að færa honum tíðindin,“ segir baráttukonan og listamaðurinn Andrea Aldan og bætir við:
„Þar sem guð hefur verið rekinn fyrir vanrækslu í starfi og spillingu í stjórnarráðum og stofnunum reknar undir hans nafni, verður Íslenska kirkjan lögð niður og öll fjárlög sem áður runnu til hennar munu nú renna til uppbygginga í þjóðfélaginu þar sem hennar er þörf, og þar er fyrst á dagskrá niðurgreiðsla sálfræðikostnaðar.“
Hún segir að „hin íslenska kona og kynfæri hennar eru nú fullvalda og hefur hún fullt málfrelsi, en hluti af fé sem rann til þjóðkirkjunnar, mun nú renna í Pungafýluþöggunarsjóð þar sem menn geta kært meiðyrði og ærumeiðingar.
Samkvæmt nýjustu tölum frá miðilsfundum við ömmu, segir hún að allar líkur séu á að 99,5% kvenna verði sýknaðar af ákærum um meiðyrði; ferlinu hefur verið breytt, bæði gerandi og þolandi þurfa að fara í gegnum 5 sálfræðitíma hvor, til að meta tilfinningalegt ástand og viðhorf þeirra beggja til atburðarins.“
Andrea Aldan hefur verið afar áberandi í baráttunni gegn kynbundnu ofbeldi; hún er baráttuglöð; hreinskilin og heiðarleg og þorir að koma fram undur nafni og með mynd opinberlega.
Andrea Aldan er ekki hrædd.
„Hæstaréttardómari og héraðsdómur sem dæmir í málum kynferðisafbrota verða eingöngu konur, enda er fásinna að karlmenn sem hafa lifað í vellystingum og öryggi í gegnum nám og vel launaða vinnu, með kvenkyns þjóna í formi mæðra og eiginkvenna geti með einhverju móti tengt við þann sársauka að fá óboðna lostasveðju upp í sitt skaut, og ganga síðan um með skammarský geranda síns þegjandi og hljóðalaust út lífið.“
Bætir þessu við:
Refsingum verður einnig breytt, en dæmdir kynferðisafbrotamenn verða allir skyldugir til að sitja hálfsárs námskeið í kynjafræði hjá Karlmennskan og í fangelsum landsins verður skylda að knúsa annan mann 5x á dag og læra að tala um tilfinningar.
Frekari refsingar og lagarammi verður ákveðinn af einhverjum öðrum en mér, þar sem ég er bara léttmanískur listamaður með mjög fína hugmynd og er örugglega með of mikinn athyglisbrest til að lesa lög. Þau eru líka leiðinleg því það er ekkert myndmál eða brandarar þar, en ég er viss um að einhver góður í lögfræði og stjórnmálafræði getur unnið hugmyndina áfram.
Takk fyrir að lesa.
Ps: Þessi póstur er skrifaður eftir að hafa hlustað á Auði Haralds í allan dag á Storytel og ég er svo 100% innblásin af henni núna.“
Athugasemdir