Reykjavíkurdætur eru ekki ánægðar með Bubba Morthens eftir að hann tjáði skoðun sína á Twitter um úrslitin í Söngvakeppninni. Þar hrósaði hann sigurlaginu og flytjendum þess á meðan Reykjavíkurdætur reyndu bara að vera kúl.
„Mikið gladdi það mig lagið sem komst áfram og þar held ég að þær systur með hógværð sinni og tónlistargáfu og getu hafi sínt hjartað getur ekki logið sama hvað Reykjavíkudætur eru töff kúl og allt það en það vantaði samt þetta sem skildi á milli þessara 2 laga,“ segir Bubbi.
Sigríður, Elísabet og Elín Eyþórsdætur unnu keppnina með framlagi sínu Turn This Around og kepptu þær í úrslitaeinvígi við Reykjavíkurdætur. Bubbi segir það einfaldlega hafa verið hógværðin og tónlistargáfa systranna sem hafi skilið á milli.
Reykjavíkudætur hafa hins vegar svarað Bubba fullum hálsi. Steinunn Jónsdóttir segir að atriðin hafi vissulega verið ólík en þau hefðu bæði verið flutt af hógværð og ástríðu. „Við settum allt okkar hjarta í okkar flutning líka og komum fram við alla af hógværð og virðingu. Bara mjög ólík atriði og lög sem eiga það sameiginlegt að vera samin og flutt af ástríðu af flytjendum sem eru búnir að ganga í gegnum mikið saman. Krabbar í körfu er tímaskekkja.“
Þuríður Blær Jóhannsdóttir sagði til að mynda að hún virðist hafa misskilið Bubba í gegnum tíðina „Ég dýrka þig Bubbi og það sem þú hefur staðið fyrir í gegnum tíðina, en ef þér finnst að karlar megi hafa hátt og konur ættu að sýna ,,hógværð”, þá hef ég misskilið þig hrapallega,“ segir Þuríður Blær.
Athugasemdir