Hvort sem landsmenn trúa því eða ekki, virðist sól vera í kortunum á morgun. Einar Sveinbjörnsson, veðurfræðingur hjá Bliku, grínast með sjaldgæfa sólargeislana og gefur út „gula viðvörun“ í færslu á Facebook-síðu sinni.
Miklar leysingar hafa verið á höfuðborgarsvæðinu undanfarið og hér um bil allur snjór á bak og burt. Svipað er uppi á teningnum á Akureyri.
Veturinn hefur ekki farið sérlega mjúkum höndum um landsmenn, með hverri veðurviðvöruninni á fætur annarri. Ýmist gulri, appelsínugulri eða rauðri. Heildarfjöldi veðurviðvarana Veðurstofunnar var 117 í febrúar.
Því þykir flestum eflaust kærkomið að sjá loks til sólar.
Þótt sú gula eigi að láta sjá sig á morgun þýðir það þó engin hlýindi. Hiti verður rétt yfir frostmarki.
„Hætt er við ofbirtu og finnið til sólgleraugun í tíma,“ segir Einar í færslu sinni. „Viðkvæmir gætu þurft sólvörn.“
„Horfið ekki af einskærri forvitni beint í sólina og fylgist vel með veðurspám,“ áréttar Einar að lokum.
Athugasemdir