Ásgeir heldur enn sambandi við sína gömlu liðsfélaga: „Ekkert til að halda mikið upp á sko“

Einn allra besti knatt­spyrnu­maður Íslands­sög­unnar á afmæli í dag. Ásgeir Sig­ur­vins­son er 67 ára í dag.

Atvinnu­fer­ill Ásgeirs spannar 17 ár en Ásgeir fædd­ist í Vest­manna­eyjum og lék með ÍBV 1972 og 1973, 21 leik í 1. deild og skor­aði í þeim 7 mörk.

Hann gekk svo til liðs við belgíska 1. deildar félagið Standard Liege um mitt sumar 1973 og náði strax að tryggja sér fast­ann sess í lið­inu. Ásgeir lék með Standard fram á sum­arið 1981, og var einn af horn­steinum liðs­ins. Hann var fyr­ir­liði liðs­ins um skeið og vann einn bik­ar­meist­ara­titil með félag­inu.

Sumarið 1981 gekk hann til liðs við þýska stór­veldið Bayern München. Með lið­inu léku nokkrir af Evr­ópu­meist­urum Vestur-Þýska­lands 1980 og fékk Ásgeir fá tæki­færi.

Sumarið 1982 gekk hann svo til liðs við þýska félagið Stutt­gart og lék með því til loka fer­ils síns. Ásgeir var lengi fyr­ir­liði Stutt­gart og þótti einn besti leik­maður þýsku 1. deild­ar­innar um margra ára skeið. Leiddi hann Stutt­gart til meist­ara­tit­ils vet­ur­inn 1983-1984 og var þá kjör­inn besti knatt­spyrnu­maður V-Þýska­lands af leik­mönnum deild­ar­innar.

Vorið 1989 lék hann með Stutt­gart gegn Napoli í úrslita­leikjum UEFA-bik­ar­keppn­innar, en Napoli stóð uppi sem sig­ur­veg­ari. Ásgeir lék alls 211 leiki í Bundeslig­unni og skor­aði 39 mörk. Hann lagði skóna á hill­una vorið 1990 og lauk þar með glæsi­legum 17 ára ferli hans sem atvinnu­manns. Alls lék Ásgeir 45 leiki með íslenska lands­lið­inu og skor­aði 5 mörk. Tvívegis var hann kos­inn íþrótta­maður árs­ins, 1974 og 1984. Þá þjálf­aði hann Fram eitt sumar og íslenska karla­lands­liðið í knatt­spyrnu í tvö ár. Árið 2015 var hann tek­inn inn í heið­ur­höll ÍSÍ.

Þessar upp­lýs­ingar eru frá fot­bolti.net.

Mannlíf hringdi í Ásgeir og spurði hann út í afmælið, hvort hann ætl­aði að halda upp á það.

„Nei,“ sagði Ásgeir og hló. „Þetta er ekk­ert stór­mál. Eflaust verður ein­hver kaka en þetta er nú ekk­ert til að halda mikið upp á sko.“

Framundan hjá Ásgeiri eru utan­lands­ferðir. „Ég býst nú frekar við því að fara utan í sumar. Ætli ég fari ekki á mínar gömlu slóðir, í Þýska­landi eða Belgíu.“
Aðspurður hvort hann haldi enn sam­bandi við sína gömlu liðs­fé­laga sagði hann „Já, já, ég geri það.“