Árið 2017 tapaði kvennalið Skallagríms í körfuknattleik nokkuð stórt í fimmta leik í úrslitakeppninni gegn Keflavík. Eftir leikinn fékk lykilleikmaður Skallagríms heimsókn frá Ámunda Sigurðssyni, fyrrverandi lögreglumanni, sem þá var formaður meistaraflokksráðs kvenna. Með honum í för var Ásmundur Einar Daðason, ráðherra, sem þá var formaður kvennaráðs Skallagríms. Heimsóknin var engin kurteisisheimsókn en þar var hún sökuð um að hafa viljandi tapað leiknum fyrir Skallagrími með lélegum leik.
Tavelyn Tillman (nú James) er bandarísk körfuknattleikskona sem lék meðal annars í landsliði Bandaríkjanna og í WNBA deildinni. Lék hún með Skallagrími á tímabilinu 2016-2017 en hún var með betri leikmönnum deildarinnar með 24,4 stig að meðaltali í leik og þar með fjórða stigahæsti leikmaður deildarinnar, það tímabil. Þrátt fyrir gott tímabil lagði hún körfuboltaskóna á hilluna og flutti aftur til Bandaríkjanna eftir tímabilið.
Í samtali við Mannlíf lýsir Tavelyn heimsókninni sem hafði mikil áhrifa á hana.
„Ég var svo sjokkeruð að þeir tveir skyldu koma heim til mín,“ sagði hún og hélt áfram. „Þeir sökuðu mig um að hafa viljandi skotið illa svo liðið myndi tapa fimmta leiknum gegn Keflavík. Ámundi kallaði mig „a little black nigger bitch“. Ég reyndi að taka heimsóknina upp á ipadinum mínum en hann sló hann úr höndunum á mér. Þeir sögðust hafa heyrt mig tala í síma fyrir leik þar sem ég á að hafa sagst ætla að tapa leiknum svo ég kæmist heim um páskana.“
Aðspurð hvort Ásmundur Einar hefði verið dónalegur við hana líka neitaði hún því. „Hann var reyndar sá rólegi. Hann kom almennt ekki illa fram við mig, að minnsta kosti ekki þannig að ég tæki eftir því.“
Blaðamaður Mannlífs spurði Tavelyn hvort hún hefði verið látin hætta hjá Skallagrími en því neitaði hún. „Tímabilið var búið eftir leikinn og ég hefði ekki viljað halda áfram hvort sem er.“
Tavelyn hætti í körfubolta eftir þetta tímabil með Skallagrími. Hún var þá orðin 32 ára en átti enn mikið eftir á tankinum enda með 24,4 stig að meðaltali í leik með Skallagrími, auk þess sem hún tók 5,9 fráköst og sendi 3,9 stoðsendingar.
Aðspurð hvort hún hefði hætt vegna aldurs eða vegna heimsóknarinnar svaraði hún: „Bæði vegna aldursins og þessa atviks ef ég á að vera hreinskilin. Maður veit, þegar maður gefur svo mikið af sér fyrir liðið og gerir sitt allra besta en ert svo sakaður um óheilindi og síðan kallaður negri, er bara komið nóg.“
Mannlíf hringdi í Ámunda Sigurðsson og bar þessa frásögn undir hann en hann neitaði harðlega.
„Það getur bara ekki verið því hún fór bara beint til útlanda eftir þann leik, hvaða kjaftæði er þetta? Það er bara kjaftæði. Þetta er vinkona mín,“ svaraði Ámundi.
Er Mannlíf bar undir hann hvort hann hefði kallað Tavelyn „little black nigger bitch“ neitaði Ámundi: „Ég get ekki einu sinni borið það fram svo er nú hæpið að ég hafi kallað hana það.“
Ekki náðist í Ásmund Einar Daðason við vinnslu fréttarinnar.
Athugasemdir