Margir innan Samfylkingarinnar hafa í dag heiðrað Loga Einarsson, fráfarandi formann, á samfélagsmiðlum. Flestir segja af honum sögu, yfirleitt jákvæða og gamansama. Það á ekki við um Oddnýju Harðardóttur, sem var formaður flokksins þegar Logi tók við. Hún hafi algjörlega brotnað niður á Bessastöðum þegar hún sagði af sér formennsku.
Oddný segir á Facebook: „Það var í kosningunum 2016 að Samfylkingin fékk þrjá þingmenn. Reyndar þrjá öfluga landsbyggðarþingmenn þá Loga Einarsson, Guðjón Brjánsson og mig sjálfa.
Þá hafði ég verið formaður Samfylkingarinnar í tæpa fimm mánuði, sumarið sem við kusum Guðna sem forseta og gerðum það gott í EM í knattspyrnu.“
Oddný segist hafa ákveðið að hætta á Bessastöðum. „Það er mikilvægt fyrir íslenskt samfélag að raddir jafnaðarmanna heyrist hátt og skýrt á þingi. Ég hefði getað sagt sem svo að ég þyrfti lengri tíma til að byggja flokkinn upp. Hann hafði mælst illa í skoðunarkönnunum áður en ég tók við.
En mér fannst að þessi afgerandi niðurstaða kallaði á afgerandi viðbrögð. Og ég ákvað að segja af mér formennskunni á Bessastöðum eftir samtal sem allir flokkar áttu þá við forsetann eftir kosningar og tilkynnti að Logi tæki við, en hann var þá varaformaður,“ segir Oddný.
Þetta voru skiljanlega þung spor. „Þetta var ekki auðvelt og á fundinum með Guðna forseta féllu vissulega tár en hann hjálpaði mér að ná mér nægilega til að fara frá honum til að hitta fjölmiðla sem biðu.
Ég fór með fyrirfram æfða yfirlýsinguna og ók svo af stað eftir afleggjaranum frá Bessastöðum með tárin í augunum. Jafnaði mig aðeins á bensínstöðinni í Garðabæ þar sem ég beið eftir Eiríki sem var að koma með rútunni frá Keflavík.“
Oddný segist ekki sjá eftir þessu í dag. og þakkar Loga kærlega fyrir. „Ég ákvað að vera áfram á þingi og styðja Loga og Guðjón eins mikið og ég gæti. Og skref fyrir skref fór fylgið upp og fleiri vildu koma með í liðið. Vonandi vegna jafnaðarstefnunnar fyrst og fremst.
Logi hefur verið góður formaður í rúm fimm ár. Takk fyrir kæri félagi.“
Athugasemdir