Dularfullt mannshvarf varð er Thomas Bjerco strandaði við Ísland – Þorði ekki að fara frá borði

Í mars­mán­uði árið 1973 strand­aði hið danska flutn­inga­skip Thomas Bjerco á Eyja­fjalla­sandi. Tókst að koma allri áhöfn­inni, sem taldi 11 manns frá borði að und­an­skildum einum, honum John Albech Adelund, sem þorði ekki frá borði. Var því ákveðið að koma öllum nema honum, fyrsta vél­stjóra og skip­stjór­anum frá borði og sækja síð­ustu þrjá síðar. Þegar sækja átti þre­menn­ing­anna fannst John Albech ekki.

Tíminn sagði svo frá strand­inu:

Dul­ar­fullt manns­hvarf við Eyja­fjalla­sand: DANSKT SKIP STRANDAÐI. EINN SKIPVERJA TÝNDUR

Reykja­vík. Á föstu­dags­kvöldið um klukkan níu strand­aði danska flutn­inga­skipið, Thomas Bjerco frá Árósum, á Eyja­fjalla­sandi fyrir vestan Holtsós. Var skipið í leigu­flutn­ingum á vegum Hafskips og var það á leið til Reykja­víkur með um 500 lestir af vörum, mest jap­anska bíla. Björg­un­ar­sveitir frá Vestur-Land­eyjum og Hvols­velli fóru þegar til aðstoðar og skip lón­uðu fyrir utan strand­stað­inn. Áhöfn skips­ins var 11 menn, og var ákveðið skömmu eftir strandið, að senda 9 þeirra í land í gúmm­báti. Þegar til kom þorði einn skip­verja ekki að fara í bát­inn, en nokkur kvika var þá við skips­hlið. Fékk þá maður þessi leyfi til að vera eftir um borð ásamt skip­stjór­anum og 1. vél­stjóra. Þegar þessir tveir menn ætl­uðu að yfir­gefa skipið fannst mað­ur­inn hvergi, þrátt fyrir víð­tæka leit þeirra um borð.

Við náðum í gær­morgun tali af séra Halldóri Gunn­ars­syni, sókn­ar­presti að Holti undir Eyja­fjöllum, en hann var á strand­staðnum alla nótt­ina. Sagði hann okkur, að búið væri að fara aftur út í skipið og leita að þessum manni, sem er fer­tugur Kaup­manna­hafn­ar­búi, en hann hefði ekki fundizt þar. Einnig væri búið að ganga fjörur og leita þarna í næsta nágrenni, en allt hefði komið fyrir ekki. Væri hvarf þessa manns und­ar­legt í alla staði. Halldór sagði okkur, að þegar bátnum með mönn­unum 8 um borð var ýtt frá skip­inu, hefði þetta litið illa út í fyrstu, því að bát­ur­inn sog­að­ist út og var mesta mildi, að ekki fór verr en á horfð­ist í fyrstu. Halldór sagði, að veður á strand­staðnum væri gott. Margt manna hefði verið á staðnum í morgun. Þar á meðal væri menn frá Björgun, og væru þeir að kanna aðstæður til að bjarga skip­inu eða bíl­unum úr þvi. Stórt gat er komið á síð­una sjáv­ar­megin, en skipið liggur þarna flatt fyrir á rifi í um það bil 150 til 200 metra frá landi. Skip­brots­mönn­unum líður öllum vel, en þeim hefur verið komið fyrir á bæjum þarna í nágrenn­inu.

Lík Johns Albech, fannst 1. apríl sama ár á sönd­unum vestan við Dyr­hólaey. John var 45 ára að aldri.