Svo virðist sem konur í Bretlandi þjáist af meiðslum og öðrum heilsufarsvandamálum vegna vaxandi vinsælda endaþarmsmaka meðal gagnkynhneigðra para. Læknarnir, Tabitha Gana og Lesley Hunt, fjölluðu um málið nýverið í British Medical Journal. Skurðlæknarnir segja afleiðingarnar meðal annars vera þvagleka, kynsjúkdóma og blæðinga í kjölfar kynlífsins.
Tabitha og Lesley héldu því einnig fram að tregða lækna, til að ræða áhættuna í tengslum við endaþarmsmök, hafi leitt til þess að konur skaðast af iðkuninni. Segja þær um að ræða kynslóð kvenna sem ekki séu meðvitaðar um hugsanleg vandamál. „Endaþarmsmök telst áhættusöm kynlífshegðun vegna tengsla við áfengis-, fíkniefnaneyslu og marga kynlífsfélaga,“ sögðu þær og bættu við að klámvæðing og sjónvarpsþættir gætu hafa stuðlað að þróuninni. Konur sem stunda endaþarmsmök eru í meiri hættu á því að hljóta ýmsa kvilla en karlar.
„Tilkynnt hefur verið um aukna tíðni saurþvagleka og skaða á hringvöðva hjá konum sem stunda endaþarmsmök,“ segir í skýrslu sem fylgir skrifum læknanna. Þrátt fyrir aukinn áhuga fólks á endaþarmsmökum segja þær marga lækna, sérstaklega heimilislækna og sjúkrahúslækna, trega til að ræða við konur um áhættuna sem fylgir því.
Athugasemdir