Hljómsveitin TAB gefur út nýtt lag í dag á Spotify.
TAB er glænýtt band og skipa Bjartmar Þórðarson, Tinna Kristinsdóttir og Arna Rún Ómarsdóttir það en þau hafa öll verið töluvert viðriðin tónlistarbransann, hvert á sinn hátt. Útsetningar eru í höndum Bomarz (Bjarka Ómarssonar) en hann hefur skapað sér frábært nafn í poppheiminum hérlendis sem erlendis undanfarin ár.
Arna og Bjartmar eru ekki nýgræðingar í bransanum og hafa verið að gera tónlist undir eigin nöfnum, Bjartmar indískotið rafpopp en Arna gefur einmitt út kraftballöðuna Fly Away núna í nóvember næstkomandi. Þau eru einnig starfandi CVT raddþjálfar. Tinna hefur starfað með sönghóp lengi en TAB er fyrsta poppverkefni hennar, en á engu að síður dúndrandi sterka innkomu.
Hið nýja lag, Keep It Simple, er „brakandi ferskt og kraftmikið danspopp sem fær jafnvel stirðustu einstaklinga til að dilla sér,“ eins og hljómsveitin lýsir því.
Að sögn hljómsveitarmeðlima vísar titillinn til þess endalausa lífsgæðakapphlaups og flækjustigs sem getur stundum rænt mann gleðinni, en hvað er þá betra en að vinda ofan af flækjunni og dansa svolítið? Textinn varð til á Covidtímabilinu þegar fólk neyddist til að einfalda líf sitt töluvert. Sumir upplifðu frelsistilfinningu við að þurfa að hægja á sér og veltir textinn því upp hvort einfaldleikinn sé stundum kannski bara meðalið sem við þurfum til að takast á við lífið í nútímanum.
Hér er hlekkur á lagið á Spotify:
https://open.spotify.com/album/4MzY7eTnPtOZXquUXOaSNS?si=XnB10mLATOKxhspYlrKSZA
Athugasemdir