Gunnar Smári Egilsson, forsprakki Sósíalistaflokksins, biður netverja um að senda sér í einkaskilaboðum myndir af hinum meintu íslensku hryðjuverkamönnum, sem ræddu sín á milli um að drepa sósíalistaforingjann, 3 pírata á þingi og Sólveigu Önnu Jónsdóttur, formann Eflingar. Um leið nafngreinir alþýðumiðillinn Samstöðin, sem Gunnar keyrir áfram, mennina tvo en þeir heita Sindri Snær Birgisson 25 ára og Ísidór Nathansson 24 ára.
Í gær féllst Landsréttur ekki á kröfu saksóknara um tveggja vikna gæsluvarðhald til viðbótar yfir mönnunum en féllst á eina viku yfir hvorum þeirra.
Sjá einnig: Sólveig Anna: „Auðvitað óhugnanlegt að þessir menn voru að gæla við að taka mig af lífi“
Gunnar Smári og Sólveig Anna voru kölluð til vitnaleiðslu hjá lögreglu og hið sama á við um píratana þrjá, þá Björn Leví Gunnarsson, Helga Hrafn Gunnarsson og Smára McCarthy. „Miðað við tímasetninguna var ég þarna á veitingastað að borða með 15 ára dóttur minni,“ segir Gunnar Smári eftir að honum var tilkynnt að hinir meintu íslensku hryðjuverkamenn gældu við að drepa sig. Hann útskýrir í færslu á Facebook hvers vegna honum þótti mikilvægt að hinir meintu hryðjuverkamenn væru nafngreindir:
„Við rannsóknina hefur komið í ljós að þeir gældu við að drepa nokkurn hóp af fólki, sem virðist hafa það sameiginlegt að fara í taugarnar á hægrimönnum. Ég studdi nafnbirtinguna sem blaðamaður og ég styð hana líka sem einn þeirra sem þessir menn ræddu um að drepa. Ég vona að birting nafnanna leiði til þess að myndir af mönnunum verði birtar. Eins og það fólk sem þeir voru að gæla við að myrða þá þarf ég eiginlega að vita hvernig þeir líta út, úr því að þeim verður sleppt úr gæsluvarðhaldi á föstudaginn. Þið getið sent mér myndir í einkaskilaboðum,“ segir Gunnar.
Athugasemdir